بیر کیمسه نین یوخدو مندن خبری

دوست یولوندا جفا چکدیم، جان اوزدوم،
یئتیشمه‌دیم بیر مکانه، آی مدد.
سراسر اندامیم موم تک اریدی،
عشق آتشی دوشوب جانه، آی مدد.

مرادیمیز شکوفه سی بیتمه دی،
بلالی سریمدن سودا گئتمه دی،
یئتر اولدو عؤمور باشه، یئتمه دی،
الیم زلف پریشانه، آی مدد.

قالمیشام گؤز یولدا، کؤنول انتظار،
غم توتوب یاخامی هر یانا دارتار،
من بیلمنم نئجه باغلانیب یوللار،
بیر گلن یوخ بو ویرانه، آی مدد.

آیری دوشمک وطنیمدن یاماندی،
دیار غربتده اؤلدوم، آماندی.
ایتیرمیشم یاری خیلی زاماندی،
آختاریرام یانه-یانه، آی مدد.

بیر کیمسه نین یوخدو مندن خبری،
او قاشلاری یایی سئوندن بری،
شکسته ذاکیرم، آهیم اثری،
اود سالیبدی آسمانه، آی مدد.