کؤنول او شوخی اؤتور، بی‌وفادی قوی گئتسین

کؤنول او شوخی اؤتور، بی‌وفادی قوی گئتسین،
ایشی همیشه جهاندا جفادی، قوی گئتسین.
وفاسی یوخدو اونون، ترک قیل، بودور وجهی،
رقیب کافر ایلن آشنادی قوی گئتسین.
اگر چه زحمتینی روزگاردا چکدین،
بس ایندی باخ ایشینه برملادی قوی گئتسین.
اولان بو دلبره پابند، هئچ خلاص اولماز،
کی زُلفونون تئلی دام بلادی قوی گئتسین.
سالار بلایا سنی بو نگار بی‌همتا،
اگر چه سرو قد و مهلقادی، قوی گئتسین.
بو دهرده بیرینین خیرینی اگر دئیه‌سن،
اونون یانیندا یقیناً خطادی، قوی گئتسین.
بو حُسنون عاقبتی یوخدور ال گؤتور بوندان،
بو حُسنده اولان آخر گدادی، قوی گئتسین.
منی گورنده، اوزونو دولاندیریر مندن،
دالیمجا فحش وئریر بی‌حیادی قوی گئتسین.
ز بس فراقینی چکدیم همیشه مضطر تک،
گورن دئدی بو گوزل بی‌وفادی، قوی گئتسین.