صبا یئتیر یئنه مندن او گول عذارا سلام،
صبا یئتیر یئنه مندن او گول عذارا سلام،
سؤله کی عاشقین ائیلر سنه بو نوع پیام.
کی: «ای بو عصرده یوسف مثال یعقوبوم،
بو گون بو کلبهی احزانا ائیله بیرجه خرام.
نهدندی سلب ائلهدین التفاتین عاشقدن،
نهدیر بو بارهده منظور منتهای مرام؟
مگر زمانهده رسمی رفاقتین بو ایدی،
کی خوبرو سالیر عشاقی هجر اودونا مدام.
دوروبدو کویونآرا فوج فوج عشّاقین،
نه وقت بس سیناجاقدیر نظام اهل نظام؟
روادی زهر فراقینله تلخکام عشاق،
ولیک شهد وصالینلا غیر شیرین کام؟
سموم هجر ایله سولموش بو گلشن عیشیم،
ترحم ائیله منه زندگانلیق اولدو حرام.
من ستمکشی سالدین بلای هجرانا،
کؤنول قوشونا خم زُلفون اولدو حلقهی دام.
ز بس کی یوخدو فراقیندا صبر و آرامیم،
صباح و شام مشخص دییل قعود و قیام.
تصور ائیله نه قسمی تحّمل ائیلیهرم،
رقیب طعنهسینه بو فراقا صبح ایله شام.
نه وقتهدک اولو مسدود بو طریق وصال،
هاچان مشامه یئتر بوی زُلف عنبر فام.
بو حسن گلشنینه عندلیب اولوب مضطر،
بو عشقه سالدی اونو چونکو گردش ایام.»