بو نوع سالما نظردن منی جَعَلْتَ فَدَاك
بو نوع سالما نظردن منی جَعَلْتَ فَدَاك،
کی غصه باالله ائدر عاشقین جهاندا هلاک.
سنین کیمی گوزل اؤز عاشقینی خوار ائلهمز،
روادی بؤیله قالام خلق آرا گریبان چاک؟
جفای بیحد و بیمر سن ائتمه عشّاقا،
بو آه و نالهیه ائیله نظاره ای ضحاک.
تؤکوبدو قان یئره ناحق نه قدر مژگانین،
بیرینه رحم ائلهمز بو ستمگر بیباک.
وصالین عاشقه شهد و شکردی واللهی،
ولیک تلخدی هجرین چو لولهی تریاک.
فنون عشوهنی، قانون غمزهنی یاد ائت،
کی دلربا اولو، سن بویدا دلبر چالاک .
ویراندا او لب خندانییا دئیر کؤنلوم،
آلیب الینه عقیق یمن یئنه حکاک.
مسلسل عارضیوه سالما زُلف مشکینی،
دوتوبدو ماهین اوزون ممکن اولمورو ادراک.
غلام اولا منه خوبان روزگار تمام،
قبول ائیلهمرم بو زمانهده حاشاک .
تباركالله عجب صنعتی ائدیب اظهار،
کی منجلاب منیدن یاراتدی نطفهی پاک.
جهاندا شعر گرانمایهنین بهاسی نهدیر،
قویوبدی شاعر آدین مضطرا کی هر دلّاک.