نئجه صبر ائیله‌سین هجرانا جانا ناتوان جانیم؟

نئجه صبر ائیله‌سین هجرانا جانا ناتوان جانیم؟
بو هجران آتشینه یاندی، رحم ائت، الامان جانیم.
غریب سنگدلسن، ای نگاریم! بی‌وفاسان چون،
ترّحم ائیله‌مزسن چوخ ائدر آه و فغان جانیم.
گئجه صبحه کیمی افغان و ناله ائتمه‌ییم نئیلیم،
یانار بو آتش هجرانا دئمك عالمده عیان جانیم.
اگر بو راه عشقینده یئته هر محنت عشاقه،
نه عیبی وار سنه قرباندی ای غنچه دهان جانیم.
خیالیم وار بو نقد جانی صرف ائیلیم کی راهیندا،
بو سودادان یقین کئچمز اگر ائتسه زیان جانیم.
ازل گوندن هوای عشقین ایلن بی‌قرارام من،
بودور وجهی چکر دایم بئله سوز نهان جانیم.
اودور بو مرغ دل آه و فغان ائیلر بو جمده،
اولوبدور ناوک مژگانییا گویا نشان جانیم.
ترحّم عاشق نالانه ائتمز بی‌مروتدیر،
منِ بی‌چاره‌یه اولماز نگاریم مهربان جانیم.
بو درد عشقی یوخسا گؤرمه‌دین روز ازل بیرـ بیر،
چک ایندی بو غم عشقی بو هجرانا یانان جانیم.
گرفتار اولسا هر کیمسه بو زنجیر محبتده،
گرکدیر اولماسین آسوده غمدن هر زمان جانیم.
نگارا مضطر بی‌چاره دایم آرزو ائیلر،
نولایدی بزم وصلینده اولایدی میهمان جانیم.