گل ایمدی یانیما ای گول عذار سیمین تن،
گل ایمدی یانیما ای گول عذار سیمین تن،
کی سرافراز ائله عشّاقی دوست وار دشمن.
اوتور یئره باشییا تا دؤنوم دولانیم من،
چکیم کنارا او رعنا قدین چو پیراهن.
نئجه رقیب ایله میل ائیلیسن مصاحبته،
تعجّبم دوتوب الفت پریله اهریمن!
غزال تک منی گؤرچک نهدن فرار ائدیسن،
من عاجز اولموشام عشقینله قاچما هئچ مندن.
بو مشکل امریدی ترک ائیلهییم سنی باالله،
کی عشق اهلینه کویوندو وادی ایمن.
اولوبدی رشتهی زُلفونله مرغ دل پابند،
سوروننم هر یئره گئتسن یانینجا چون دامن.
نه قدر ظلم ائدهسن راضیم جهان ایچره،
گرکدی من قاچام ای شوخ مهلقا سندن.
مگر بو نالهی شبگیریمی ائشیتمهمیسن؟
نهدن ترحّمه گلمز او خاطر آهن.
قارا ائدیب گونومو زُلف عنبر افشانین،
وصالین ایله اولور بو قارا گونوم روشن.
بو نظمی شوق رخ یار ایله یازیب مضطر،
سبب اودور کی بئله آبداردیر احسن.