منو
×
باش صفحه
سون آرتیریلمیشلار
سئویلمیشلر
بلاگ
مین سؤزه یاردیم
مین سؤز
باش صفحه
سون آرتیریلمیشلار
سئویلمیشلر
بلاگ
مین سؤزه یاردیم
بایاتی
مین سؤز
ائل ادبیاتی
بایاتی
سؤز قالدی ائل گلنه،
چؽرماندی سئل گلنه.
گؤزل بیر باغ سالمیشام،
ائل گله کؤلگهلهنه.
بو ائلین آدی ندی؟
دوستو نه، یادی ندی؟
غۆربت ائلده بیلمهدیم،
آغزیمین دادی ندی؟
باخدیم شیرین دیللره،
دۆشدوم قورو چؤللره.
آختاردیم قوهوم-قارداش،
حسرت قالدیم ائللره.
پاییز قؽشدان ازلدی،
یارپاق تؤکن خزلدی.
وطن ویران دا اولسا،
او، جنّتدن گؤزلدی.
گؤی بولود، شیروان آیاز،
یاز منی، شیروانا یاز.
گۆنون یاد ائلده کئچسه،
دردینی شیروانا یاز.
آرازا گمی گلدی،
من دئدیم، هامی گلدی.
سن آغلا، آی گؤزلریم،
آیریلیق دمی گلدی.
عزیزییم دیلن، گز،
باغدا گۆله دیلن، گز.
غۆربتده خان اولونجا،
وطنینده دیلن، گز.
گمی گلدی، یان گلدی،
ایچینده بیر جان گلدی.
وطن حسرتی چکدیم،
گؤزلریمه قان گلدی.
قوی گئدیم یوردا منی،
تاپشیرما قوردا منی،
گؤزو یولدا قالان وار،
اؤلدورمه بوردا منی.
قارداش گل، آی قارداش، گل،
قارلی داغلاری آش، گل.
غۆربت ائلدیر، کیمسم یوخ،
تؤکور گؤزوم قان-یاش، گل!
عزیزیم کتان یاخشی،
گئیمهیه کتان یاخشی.
غۆربت یئر جنّت اولسا،
یئنه ده وطن یاخشی.
آغریدیر یارا منی،
طبیب یوخ یارا منی.
بوردا بیر کیمسنم یوخ،
یئتیرین یارا منی.
بو یولدان اؤتن یاخشی،
گئیمهیه کتان یاخشی.
گزمهیه غۆربت اؤلکه،
اؤلمهیه وطن یاخشی.
توتمادی داغلار منی،
بۆلبوللو باغلار منی.
غریبهم، بیر کسیم یوخ،
تکجه یار آغلار منی.
سو گلر آرخا، هارای!
تؤکولمز چارخا، هارای!
ایگید غۆربته دۆشسه،
چاغیرار آرخا، هارای!
بو یئرلر تالا یئری،
بۆرج یئری، قالا یئری.
قیامت او گۆن قوپار،
ائل کؤچه، قالا یئری.
دردیم ائله جار هارای!
قارا گۆنوم وار، هارای!
یاد اوبا، غریب اؤلکه،
کؤنول ایستر یار، هارای!
عاشیق، قارا یاخشیدی،
گئیسن قارا یاخشیدی.
غۆربتده دولانماقدان،
گئتسن گورا، یاخشیدی.
سوراغین قارغادان آل،
حاییفین دارغادان آل.
غۆربتده یار خبرین
بیر آتی یورغادان آل.
داغلار مارالا قالدی،
اوتو سارالا قالدی.
سرین چئشمه، گؤی یایلاق
یئنه مارالا قالدی.
‹
1
2
3
4
›
»