منو
×
باش صفحه
سون آرتیریلمیشلار
سئویلمیشلر
بلاگ
مین سؤزه یاردیم
مین سؤز
باش صفحه
سون آرتیریلمیشلار
سئویلمیشلر
بلاگ
مین سؤزه یاردیم
بایاتی
مین سؤز
ائل ادبیاتی
بایاتی
بئلهدیمی غۆربت ائل،
ایگید اوغول، غۆربت ائل.
آدامی تئز قوجالدیر
غریب اؤلکه، غۆربت ائل.
عزیزیم سؤزه قالدی،
بیر شیرین سؤزه قالدی.
یاد قووولدو داغلاردان،
ائل-اوبا بیزه قالدی.
جئیران، چؤله دولان گل،
سونام، گؤله دولان گل.
یاد اؤلکهده دؤزمهسن،
بیزیم ائله دولان گل.
داغلاردا تالام قالدی،
بیچمهدیم، لالام قالدی.
داغیلسین غۆربت اؤلکه،
اوردا بیر بالام قالدی.
باغچادا باریم قالدی،
درمهدیم، ناریم قالدی.
اؤزوم یاد ائله دۆشدوم،
وطنده یاریم قالدی.
شیروانین بوز داغلاری،
باسیبدیر توز داغلاری.
یادینا دۆشر آغلار
غریبین اؤز داغلاری.
آرازدا آخار قالدی،
ترلان اوچدو، سار قالدی.
ائلیمدن آیری دۆشدوم،
گؤزلریم باخار قالدی.
گزیرم سوز داغلاری،
باغلاییب بوز داغلاری.
هر کسه شیرین اولار
اؤز یئری، اؤز داغلاری.
گئتدی آرخا دولاندی،
سولار چارخا دولاندی.
دۆشمن ائلین گۆجوندن
قورخا-قورخا دولاندی.
بو داغلار بیزه ساری،
دولان گل بیزه ساری.
غۆربتده قالان جانیم،
چکرسن یۆز آزاری.
آراز گلدی یان آخدی،
دیبیندن مین جان آخدی.
وطن ساری باخاندا
اۆرگیمدن قان آخدی.
عزیزیم کتان ساری،
آغ ساری، کتان ساری.
چؽخایدیم شاه داغینا،
باخایدیم وطن ساری.
عزیزیم مزه قانلی،
مئی قانلی، مزه قانلی.
قورخورام جاوان اؤلهم،
یوردومدا گزه قانلی.
واریمدیر درد هازاری،
آغلاما ائله زاری.
یولوم غۆربته دۆشدو،
چکیرم ائل آزاری.
عزیزیم دؤزه قانلی،
سۆرمه چک گؤزه، قانلی.
قورخورام غریب اؤلهم،
یئریمده گزه قانلی.
بو مارال ساییق دئییل،
یاتیبدیر، آییق دئییل.
غۆربتده تک قالماغیم
آدینا لایق دئییل.
گزدیم داغی، آرانی،
سئچدیم آغدان قارانی.
وطن ویران اولسا دا،
جنّت گؤردوم اورانی.
بو یول یولا تن دئییل،
یار بوردان اؤتن دئییل.
غۆربتده خوش گۆن گؤرسم،
یئنه ده وطن دئییل.
عاشیقین اودو یاری،
بایقونون اودو یاری.
غۆربتده وطن توتدوق،
اونوتدوق او دیاری.
عزیزیم کتاندا گۆل،
شالدا گۆل، کتاندا گۆل.
یئریمیز یاخشی یئردی،
حاییف کی وطن دئگیل.
‹
1
2
3
4
5
›
»