بایاتی

آراز، آراز، خان آراز،
داغلاردان آخان آراز.
یاردان بیر خبر گتیر،
ائویمی یؽخان آراز.

بو داغدا منم سنسیز،
داغی ائنمنم سنسیز.
هاردا آهو مه‌له‌سه،
بیل کی، او منم سنسیز.

آراز، آراز، خان آراز،
گل ائیله‌مه قان، آراز.
قوی گئدیم، یار گؤزله‌ییر،
ندیر بو تۆغیان آراز؟

باغا گیرمرم سنسیز،
گۆلون درمرم سنسیز.
دئسه‌لر غریب اؤلوب،
او غریب منم سنسیز.

داغلار چکر آه سنسیز،
ایل اولماز مۆباح سنسیز.
گئجه‌لر ایله دؤنوب،
آچیلمیر صاباح سنسیز.

یار کؤینگی بیزده‌دی،
دۆیمه‌لری دۆزده‌دی.
گئتدیم یاری گؤرمه‌یه،
دئدیلر تیفلیسده‌دی.

باغیندا آلما یالقیز،
آغاجدان سالما یالقیز.
گئدیرسن تئز قاییت گل،
غۆربتده قالما یالقیز.

داغدا مارال مه‌له‌دی،
دیلی یوخ، لال مه‌له‌دی.
یارا یئتمک ایسترم،
منه بیر یول بله‌دی.

داغلاردا لاله یالقیز،
گۆل بیتر، لاله یالقیز.
قورخورام یار گلمه‌یه،
سرتاختیم قالا یالقیز.

باغچالار بار ائیله‌دی،
مئیوه نۆبار ائیله‌دی.
یار منی قویدو گئتدی،
قلبیم قوبار ائیله‌دی.

عزیزی‌یم، بادام قؽز،
مهلنیزده یادام، قؽز.
بیرجه اۆزونو گؤرسم،
ایللرجن شادام، قؽز.

عزیزیم جبر ائیله‌دی،
یار یارا جبر ائیله‌دی.
ساغ اولسون اۆرگیم کی،
بیر بئله صبر ائیله‌دی.

گؤیده وار ساری یؽلدیز،
خوش گلدین، کیچیک بالدیز.
گئت باجینا دئیینن،
منی قویماسین یالقیز.

قؽش گئتدی، قار گلمه‌دی،
نه ده باهار گلمه‌دی.
ایل دولاندی، آی اؤتدو،
گؤزله‌دیم، یار گلمه‌دی.

عزیزی‌یم، قالاسیز،
شهر اولماز قالاسیز.
من کی گئدرگی اولدوم،
ساغلیغینان قالاسیز.

بو داغ یولو کسمه‌دی،
سؤزون دئدین، کسمه، دئ.
یار مندن الین اۆزدو،
اۆمیدینی کسمه‌دی.

کاغیذ یازدیم قاراسیز،
درده دۆشدوم چاراسیز.
گرک منیم دیلیمجه
یارا سیز یالواراسیز.

ترلان سارا یئتمه‌دی،
درده چارا ائتمه‌دی.
گۆنوم غۆربتده کئچدی،
الیم یارا یئتمه‌دی.

بوستان اکدیم خیارسیز،
گۆنوم کئچدی بیارسیز.
یوخودا سنی گؤردوم،
آییلدیم ایختیارسیز.

بو گۆنون آدی ندی؟
شنبه‌دی، آدینادی؟
جفا چکدیم، یار سئودیم،
بیلمه‌دیم دادی ندی.