بایاتی

عاشیقم سینه‌سینه،
میم یاز گۆل سینه‌سینه.
نه لبیم لبه دگدی،
نه سینه‌م سینه‌سینه.

آی دوغار، باتماز گئجه،
یار یارین آتماز گئجه.
آنا بالادان آیری
دینجلیب یاتماز گئجه.

عزیزی‌یم، نه فره،
نه توراج وار، نه فره.
منیم یاریم اوشاقدی،
گؤندرمه‌یین صفره.

عاشیقم، این گئجه،
دوست بویون این گئجه.
جسدده جانیم تیترر
ال-اله دگن گئجه.

گۆل آچیب دسته-دسته،
بۆلبول قونوب گۆل اۆسته.
آیریلیغا تابیم یوخ،
نئجه دؤزوم من خسته.

داغلارا چن گلینجه،
دورمادین من گلینجه.
عزرائیل جانیم آلسا،
اؤلمرم سن گلینجه.

قؽزیلگول دسته-دسته،
یاریمین بویو بسته.
غۆربتدن دؤنوب گلسه،
بسلرم سینه‌م اۆسته.

داغ دؤشونده بنؤوشه،
قویمارام باغری شیشه.
یار یولوندا آغلاماق
منه اولوبدور پئشه.

من عاشیق یازانی یاز!
آل قلم یاز، آ نیاز.
بۆلبول گۆلون یارپاغین
ساخلامیش یازا نیاز.

آراز، آراز، جان آراز،
نه گئدیرسن یان، آراز؟
سئوگیلیم گمیده‌دی،
گل ائیله‌مه قان، آراز.

اززی‌یم باقی قالماز،
زۆلف اۆزده باقی قالماز
گۆل اۆزون بیر ده گؤرسم،
دیداریم باقی قالماز.

خوش گۆنلر اله گلمز،
دولاشیب بئله گلمز.
اوچوبدو تئللی سونام،
قاییدیب گؤله گلمز.

بو داغدان آشماق اولماز،
کاغیذدان باشماق اولماز.
کۆسولو یار اؤتوردوم،
داها باریشماق اولماز.

گئدر مارالیم، گلمز،
قلبی یارالیم گلمز.
سن گلمه‌سن قاپی‌یا،
گئدر قراریم گلمز.

بو یئرلرده سار اولماز،
دومان گئتسه، تار اولماز.
وعده وئردین گلمه‌دین،
سندن منه یار اولماز.

گمی گلر، یان وئرمز،
آچما یارام، قان وئرمز.
سنی گؤزله‌ین اۆرک
اینتیظاردی، جان وئرمز.

عزیزیم خالی سولماز،
یاناغین خالی سولماز.
غۆربت دردی چکیرم،
درد مندن خالی اولماز.

عزیزیم مئشه منسیز،
داغ منسیز، مئشه منسیز.
قورخورام خیففت چکه،
یار درده دۆشه منسیز.

گئجه اوزون، آی باتماز،
دردین دردیمه چاتماز.
یاریندان آیری دۆشن
نه دینجلمز، نه یاتماز.

سو تک چاغلارام سنسیز،
قارا باغلارام سنسیز.
گئجه‌لر صبحه کیمی
درددن آغلارام سنسیز.