بایاتی

بوینوندا وار ساریلیق،
یامان اولور آیریلیق.
سن گل اؤزوندن اینجی،
گؤر نه گۆنه قالیریق.

داغ منده، تالا منده،
بۆرج منده، قالا منده.
محشریم او گۆن اولار،
حسرتین قالا منده.

آمان، آمان، آیریلیق،
اولور یامان آیریلیق.
ائشیدنده باشیمدان
قالخیر دومان، آیریلیق.

قالیانین سری منده،
چکمیشم، سری منده.
سننن کئچن گۆنلرین
قالیب اثری منده.

مهله‌میزده وار سؤیود،
وئردیلر منه اؤیود.
منیم یاریم اوشاقدی،
تانری، اونو تئز بؤیوت!

گۆن سنده، گئجه سنده،
باغا مئه گئج اسنده،
بیر جۆت قوربان کسرم
سن گلن گئجه‌سینده.

گؤزوم قالدی اینجیده،
درددیر باشا اینجی ده.
گۆلومو قویدوم گئتدیم،
قورخورام خار اینجیده.

کیشمیردن شالدی سنده،
دیل دئییل، بالدی سنده.
من وئردیگیم نیشانا
یادیگار قالدی سنده.

دردیم وار اۆرگیمده،
یارام وار کۆره‌ییمده.
تانری، منی اؤلدورمه،
آرزوم وار اۆرگیمده.

غریبه‌م بو وطنده،
گؤزوم یولدان اؤتنده.
غریبه اثر ائیلر،
طعنه‌لی سؤز یئتنده.

بیر گۆل اکدیم لینده،
گۆل بوینونو اینده.
سنه قوربان کسرم
الیم الینه دگنده.

دریانین او یۆزونده،
آت اویناتدین دۆزونده.
ایکی موراز دئمیشم،
بیری قالدی گؤزومده.

دورنالار دۆزولنده،
سیرمله سۆزولنده.
قیامت او گۆن قوپار،
ال الدن اۆزولنده.

عزیزی‌یم قار گۆنده،
یاغیر داغا قار گۆنده.
یاری گؤرمک ایسته‌ییر
اۆرگیم بو دار گۆنده.

عزیزیم قالا منده،
بۆرج منده، قالا منده.
قورخورام بیواخت اؤله‌م،
حسرتین قالا منده.

عزیزیم قالا یئرده،
بۆرج یئرده، قالا یئرده.
قورخورام غریب اؤله‌م،
جنازم قالا یئرده.

داغلاردا، مئشه‌لرده،
سرین سو شۆشه‌لرده.
هامی یئربیئر اولدو،
من قالدیم کۆچه‌لرده.

گؤزله، داغا قار گله،
ترلان اوچا، سار گله.
من گئدیرم یول اۆسته،
اۆمید وار کی، یار گله.

آشیق گلنده سؤزه،
سیملی ساز گرک دؤزه.
سن کی کۆسوب گئتمیشدین،
نئجه باخاق گؤز-گؤزه؟

مه‌له، جئیرانیم مه‌له،
بالانی وئرمه اله.
من مه‌له‌دیم، گلمه‌دی،
سن مه‌له، بلکه گله.