بایاتی

آی دوغوب باتارمولا؟
اۆلکره چاتارمولا؟
آنا بالادان آیری
دینجلیب یاتارمولا؟

خومار گؤزلر مستانا،
آدین سؽغماز داستانا.
آغلا، آ یاریم، آغلا،
تکی دسمال ایستانا.

بو گلن قمبر اولا،
مۆشک ایله عنبر اولا.
سنی منه یئتیرن
بلکه پئیغمبر اولا.

عاشیق قاراباقارا،
خالین قاراباقارا.
یارین ایتیرمیش عاشیق،
گزیر قاراباقارا.

من عاشیق، گؤزده قارا،
چک سۆرمه گؤزده قارا.
یار یارین گؤزله‌مکدن
قالمادی گؤزده قارا.

ایستکانی یارینجا،
ایچدیم، قالدی یارینجا.
بو گۆن بیر قؽزی گؤردوم،
گؤزوم قالدی دالینجا.

عاشیقین قانی قارا،
دردی چوخ، قانی قارا.
توتون قویون قفه‌سه،
گؤندرین جانی یارا.

یوللارین کنارینجا،
تؤکولوبدو قار اینجه.
سونام ساللاندی گئتدی،
لاچین دا بیر یانینجا.

من عاشیقم گۆلزارا،
چمنزارا، گۆلزارا.
آیریلیغا دؤزمکدن
آخیر گلیب گۆل زارا.

توت آغاجی بویونجا،
توت یئمه‌دیم دویونجا.
یاری خلوتده گؤردوم،
دانیشمادیم دویونجا.

من عاشیقم تئی یارا،
جانیم آلدی تئی یارا.
بوینوم کۆنده‌ده اولسون،
الیم یئتسین تئی یارا.

درد اۆرگیم اویونجا،
قوربان گئدیم بویونجا.
ائشیتسن کی، اؤلموشم،
آغلا منه دویونجا.

اۆرک شانا-شان یارا،
بیزدن سوووشان یارا.
بیر آیریلیق، بیر اؤلوم
قویماز قوووشام یارا.

غم اۆرگیم اویونجا،
گئییم آلدیم بویونجا.
اۆچ ایل نیشانلی قالدیم،
بیر گؤرمه‌دیم دویونجا.

سئیرانا گئدن اولسا،
قؽزیلگول گؤرن اولسا،
یازیب کاغیذ گؤندررم،
دوستوما، گئدن اولسا.

داغیلیبدیر قو داشا،
آخیر گلیر سو داشا.
الیم یاردان اۆزولوب،
سؽغینمیشام بو داشا.

گئدرم، گئدن اولسا،
یولون اؤیردن اولسا،
یارا نامه یازمیشام،
یانینا گئدن اولسا.

بو داغلاردان داش دۆشوب،
قلم اۆسته قاش دۆشوب.
اینتیظارام، قوی گئدیم،
یادیما قارداش دۆشوب.

گۆلرم، گۆلن اولسا،
دردیمی بیلن اولسا،
آغلاماقدان دویمارام،
گؤز یاشیم سیلن اولسا.

توت آغاجی پؽتیراق،
جرگه ووراق اوتوراق.
بیرین سن دئ، بیرین من،
اینتیظاردان قورتولاق.