بایاتی

بازاردان آلدیم قوتو،
ایچینده ککلیکوتو.
دیزین اۆسته باش قویوم،
چیمدیکله‌مه، دۆز اوتو.

سئیر ائتدیک یار، او اۆزو،
بایقونون یارا اۆزو.
او گۆندن قورخار عاشیق،
زۆلف دۆشه، یارا اۆزو.

آخشام اۆزو، دان اۆزو،
قوشلار اوخور بان اۆزو.
یاردان بیر بوسه آلدیم،
تئز بۆرودو قان اۆزو.

باغا باخ، بوستانا باخ،
دیله باخ، داستانا باخ.
نئجه کناردان کئچیر،
گؤزلری مستانا باخ.

شیروانین تلخ اۆزومو،
یئمه‌یه تلخ اۆزومو.
سندن ال گؤتورمرم،
دانلاسا خالق اۆزومو.

کاغیذین آغینا باخ،
سینه‌مین داغینا باخ.
کؤنول گؤزل ایسته‌سه،
گنجه‌نین باغینا باخ.

سولدورما گل گۆلومو،
اوچورتما بۆلبولومو.
بیر خلوت یئرده اوتور،
دئییم دردی دیلیمی.

گؤزلین آدینا باخ،
لبی‌نین دادینا باخ.
یارین فراقیندایام،
سینه‌مین اودونا باخ.

عزیزیم گؤردوگونو،
گؤز تانیر گؤردوگونو.
یاریمی خبر آلسان،
سینه‌مده گؤر دۆگونو.

بولاغین باشینا باخ،
دیبی‌نین داشینا باخ.
من سئودیگیم گؤزلین
گؤزونه، قاشینا باخ.

عاشیقم گؤردو گۆنو،
خسته‌نین گؤردوگونو.
جنّتده گؤرمز عاشیق
سنینله گؤردوگونو.

کپزین قاشینا باخ،
سال دوران داشینا باخ.
زۆلفوم یادینا دۆشسه،
داغلارین باشینا باخ.

ساقیده سۆرمه دؤورو،
همدمسیز سۆرمه دؤورو.
عاشیق دئر: گؤزلرینده
خوب سۆردو سۆرمه دؤورو.

خؽرمان اۆسته دنه باخ،
آچ گؤزونو، منه باخ.
درده درمان ایسته‌سن،
ایذین آل، گرده‌نه باخ.

قؽش چکیلیر، یازا باخ،
گؤیده سۆزن قازا باخ.
باخدی، آغلیم آپاردی،
گئدن سروینازا باخ.

دانیش، تامبوروم، دانیش!
بیر سن منیمله باریش!
آچیبان قوللارینی
گلیب بوینوما ساریش!

دومان، گل بۆرون داغا،
سۆرونو سۆرون داغا؛
یا مه‌لرم، تاپارام،
یا ساللام بیر اۆن داغا.

مارال گئتدی بو داغدا،
گئدیب ایتدی بو داغدا.
باغبان سنه نه دئیر،
بۆلبول اؤلسه بوداقدا؟

ای ساقی، قالخ آیاغا،
مئی دولدور، قالخ آیاغا.
ایللر خسته‌سی جانیم،
یار گلدی، قالخ آیاغا.

ائله‌دیمی سو یازدا،
آخار، گئدر سو یازدا.
من یاری گؤرمه‌میشم،
کئچن یاز دا، بو یاز دا.