بایاتی

آشیق چالیر، دیل اوخور،
باغچادا بۆلبول اوخور.
گؤزلده نه قایدادیر،
ساچلارینا گۆل توخور؟

شفته‌لیم آل اولوبدو،
دگیبدی، آل اولوبدو.
هر گۆن اوخویان بۆلبول
بو صاباح لال اولوبدو.

عاشیق کنده دۆشوبدور،
گلیب فنده دۆشوبدور.
سنی گؤرندن بری
کؤنول درده دۆشوبدور.

آرخین سویون کس، دولدو،
باغدا گۆلوم دست اولدو،
یارا بیر گۆل گؤندردیم،
ایله‌یینجه مست اولدو.

سو گلیر گۆلدور-گۆلدور،
سویونو بو گۆن دولدور.
سالیرسان، سال قوینونا،
سالمیرسان، منی اؤلدور.

جارا گئدن بیر یولدو،
بیری ساغ، بیری سولدو.
ایکی سینه‌ن آراسی
داماغا گئدن یولدو.

گمیم چایدا یان اولدو،
اۆرکلرده قان اولدو.
اۆزده خالینی گؤرجک
کؤنلوم بندیوان اولدو.

تورون داغدا قور، اووچو،
اووون کئچیر، وور اووچو!
نه یاتیبسان بره‌ده،
مارال گلیر، دور اووچو!

داغلار باشی قار اولدو،
گۆل باغچالار خار اولدو.
سئوگیلیم سئیره چؽخدی،
ائل-اوبا گۆلزار اولدو.

گمیم بیر یانا دؤندو،
سولار اۆممانا دؤندو.
لبیندن کام آلاندا
اۆرگیم قانا دؤندو.

ائله‌می گۆموش اولدو،
زر دؤندو گۆموش اولدو.
منیم قانلیم آغ بوخاق،
سنین قانلین دیش اولدو.

داغ آشدیم، یال گؤروندو،
دریادا سال گؤروندو.
دئدیلر یارین گلیر،
باخدیم، هیلال گؤروندو.

بولاق سویو دورولدو،
اۆسته دیوان قورولدو.
بیر گؤزلین یولوندا
سکسن ایگید قؽریلدی.

بو گۆن بازار گۆنودو،
چرچی گزر گۆنودو.
کۆچه‌لر مرمر اولسون،
یارین گزر گۆنودو.

باغچانین یاری سودو،
یاری قوم، یاری سودو.
باغمان، کسمه بوداغی،
بۆلبول گۆل واری‌سیدی.

عزیزیم گۆل اۆشودو،
شئه دۆشدو، گۆل اۆشودو.
گۆلدون، آغلیم آپاردین،
بو نئجه گۆلوشودو؟

بولاق اۆستونون بوزو،
عطیر قوخور یارپیزی.
یار گلسه، قوربانیم وار
هر سۆرودن بیر قوزو.

الیمدن قاشیق دۆشدو،
گئتدی، یاراشیق دۆشدو.
گؤروندو آی جامالین،
عالمه ایشیق دۆشدو.

بو دره‌نین اوزونو،
سۆرون گلسین قوزونو.
من قونشوسون ایسته‌دیم،
وئردی منه قؽزینی.

بیر اوخ آتدیم، یان دۆشدو،
اوووم قاچدی، قان دۆشدو.
تور قوردوم، مارال توتدوم،
بیر تۆلک ترلان دۆشدو.