بایاتی

توت آغاجی قارماقدیر،
توتو بارماق-بارماقدیر.
یار بیر نامه گؤندریب،
هر سؤزو یالوارماقدیر.

بو گلن هارالیدیر؟
داغلارین مارالیدیر.
اگیل اۆزوندن اؤپوم،
اۆرگیم یارالیدیر.

گئدیرم، یولوم داغدیر،
دؤرد یانیم باغچا، باغدیر.
چکرم یار قهرینی،
نه قدر جانیم ساغدیر.

عاشیق یاپیشقانلیدیر،
خالین یاپیشقانلیدیر.
باغدا بۆلبول اؤلوبدور،
گۆله یاپیش، قانلیدیر.

عزیزیم یار داغیدیر،
گؤرونن یار داغیدیر.
کؤنلوم فلک داغیتماز،
داغیتسا یار داغیدیر.

ائله‌می کامانیدیر،
قاش گؤزون کامانیدیر.
گیزلتمه آی اۆزونو،
دردیمین درمانیدیر.

بو داغ شفا داغیدیر،
سئیر-صفا داغیدیر.
الینی چک باشیما،
الین جافا داغیدیر.

من عاشیق خؽرمانیدیر،
قؽزیلگول خؽرمانیدیر.
الین قوی سینه‌م اۆسته،
دردیمین درمانیدیر.

عزیزیم، نه یاغیدیر؟
نه دوستدور، نه یاغیدیر.
یاناغین گۆل قؤنچه‌سی،
سینه‌ن جنّت باغیدیر.

بو گلن قارالتیدیر،
آغ سینه‌ن قار آلتیدیر.
جان گئدیبدیر عاشیقدن،
قالان بیر قارالتیدیر.

عاشیق یار آشیغیدیر،
خالین یارا شؽغیدیر.
قوربان اولوم او زۆلفه،
بویون یاراشیغیدیر.

ائله‌می قؽیقاجیدیر،
خاللارین قؽیقاجیدیر.
یادیما سن دۆشنده
قلبیمی درد آجیدیر.

آی دوغوب هیلالیدیر،
ایلدن، آیدان حالیدیر.
آغلیم آپاران گؤزل
بیلمیرم هارالیدیر؟!

داغلاردا اوی ناشیدیر،
صیّاددان اوی ناشیدیر.
گؤروشوروک خلوتده،
دئییرلر اویناشیدیر.

قاشلاری قاراداندیر،
حاق بیزی یاراداندیر.
قوربان اولدوغوم الله،
بو سئوگی هاراداندیر؟

عزیزیم حارام آغریر؟
سؽزیلدار یارام، آغریر.
طبیب اول، دردیم سوروش،
من دئییم حارام آغریر.

عزیزی‌یم نه قاندیر؟
نه غوغادیر، نه قاندیر.
یار مسکنی منیمچون
هم داغدیر، هم آراندیر.

داغدان گلیر یار، آشیر،
یار دولانیر، یار آشیر.
گل قول-بویون اولاق بیر،
گؤرک نه جۆر یاراشیر؟

دردیمی یارا قاندیر،
بایقولار یارا قاندیر.
تانری اۆچون عاشیقین
عرضه‌سین یارا قاندیر.

آی قؽز، منی بنده وور،
زۆلفونله کمنده وور.
یاخشی اولسام، قول ائله،
یامان اولسام، بنده وور.