بایاتی

بو داغدا یووشان بیتر،
آلتیندا ککلیک ایتر.
من یارا نه دئدیم کی،
آغ اۆزونده دوردو تر.

من عاشیق نه شانه‌دیر،
زۆلفون شانه-شانه‌دیر.
آغ بوخاقدا بو لکه
مندن بیر نیشانه‌دیر.

عزیزی‌یم یاری تر،
یاری قونچا، یاری تر.
کیرپیک چالما، گؤزلریم،
کؤلگه سالسان، یار ایتر.

عزیزیم ترسی ندیر؟
اۆزو نه، ترسی ندیر؟
منی بو درده سالان
آغ بوخاق، تر سینه‌دیر.

قایادا ایلان اؤتر،
باغداددا خورما بیتر.
آی قؽز، ائله ساللانما،
جاوانام، آغلیم ایتر.

یارالی یارام ندیر؟
غم ایله آرام ندیر؟
بو درده سن سالیبسان،
چکمه‌سم چارم ندیر؟

بوغدالار کؤکلو ندیر؟
یار سئودیم، بیر دانه‌دیر.
اولموشام یار دلی‌سی،
دئییرلر دیوانه‌دیر.

باغدان بار ایسی گلیر،
هئیوا، نار ایسی گلیر.
گل دولانیم باشینا،
سندن یار ایسی گلیر.

قؽزیلگولوم دسته‌دیر،
بۆلبول اوخور، سسده‌دیر.
یارین سؤزو، صؤحبتی
ائله بیل شیکسته‌دیر.

داغلاردا بیر اۆن گلیر،
آی دولانیر، گۆن گلیر.
گؤزون قاداسین آلیم،
آدین نه شیرین گلیر.

گؤیده اولدوز بسته‌دیر،
ائویمیز یول اۆسته‌دیر.
بیر صاباح گل، بیر آخشام،
دئ کی، یاریم خسته‌دیر.

باغچا بار اۆستن گلیر،
هئیوا، نار اۆستن گلیر.
آشیق دئین ماهنی‌نین
هامی‌سی یار اۆستن گلیر!

بو گئجه خوش گئجه‌دیر،
یار قوینو بوش گئجه‌دیر.
آلا گؤزدن خبر آل،
یالقیز یاتماق نئجه‌دیر؟

آراز گلیر، لیللنیر،
سویو گلیر، گۆللنیر.
یاری خلوتده گؤرجک
منیم قلبیم دیللنیر.

داغلار باشی مئشه‌دیر،
کؤنلوم سؽنیق شۆشه‌دیر.
یارین یارا تؤحفه‌سی
بیر دسته بنؤوشه‌دیر.

باغبان، منه بار گتیر،
اسیرگه‌مه، وار گتیر.
اکیلمه‌میش آغاجدان
دریلمه‌میش نار گتیر.

بۆلبول بو باغدا گزیر،
قونور بوداقدا گزیر.
جئیرانیم اؤز یانیمدا،
مارالیم داغدا گزیر.

آرخالیغین خارادیر،
باغی، بندی قارادیر.
کهر آت یهرلنیب،
یار، صفرین هارادیر؟

باغچا بارین ایسته‌ییر،
هئیوا، نارین ایسته‌ییر.
اوغلان یزه دوروبدو،
گئتمیر، یارین ایسته‌ییر.

پاییزین ازلیدیر،
باغچانین خزه‌لیدیر،
آدینا قوربان اولوم،
آدلارین گؤزه‌لیدیر.