بایاتی

پنجره‌دن ال ائیلر،
اللری گل-گل ائیلر.
ایکی کؤنول بیر اولسا،
داغدان، داشدان یول ائیلر.

عزیزیم قارا تئللر،
آغ اۆزده قارا تئللر.
سنین بو نازو غمزه‌ن،
کؤنلومو قارات ائیلر.

عاشیق نه فغان ائیلر؟
چئشمیم نه فغان ائیلر؟
سونالار گؤلده اۆزر،
نفی نه فغان ائیلر؟

من عاشیق شانه تئللر،
اولوبدو شانه تئللر.
اۆرگیمین باشینی
آلیب نیشانه تئللر.

یاقوت یمه‌نی نئیلر؟
اؤردک چمنی نئیلر؟
سن تک بویلو بوخونلو
سرو-سمه‌نی نئیلر؟

کمندین آتان تئللر،
ناز-غمزه ساتان تئللر.
ال وورما، چالار سنی
قؽوریلیب یاتان تئللر.

الینده قؽرغی نئیلر،
توتوبدو، قؽرغی نئیلر.
جلّاد گؤزلو نه گؤرموش،
عالمی قؽرغین ائیلر.

همایلی دۆزرلر،
قازلار گؤلده اۆزرلر.
ساغ الین قایداسیدیر،
گردن قوجار اۆز اللر.

من عاشیق مالی نئیلر؟
قؽزیلگول آلی نئیلر؟
منیم جانیم سنده‌دی،
جسدده قالی نئیلر؟

یاشیلباشلار اۆزرلر،
ترلان کیم سۆزرلر.
سنه تای اولا بیلمز
یۆز اوبالار، یۆز ائللر.

قؽزیلگولو دررلر،
مجمهی‌یه سررلر.
ایکی ایستکلی یاری
بیر-بیرینه وئررلر.

جارقالا اولدو شهر،
گزک بیز آیری تهر.
اۆزو قؽرمیزی گۆلدو،
قوینونون ایچی گؤهر.

قؽزیلگولو سئچرلر،
بوداغیندان بیچرلر.
وفالی یار یولوندا
جاندان-باشدان کئچرلر.

چادیر قوردوم دۆزده‌دی،
تنفلری بیزده‌دی.
اون گلین منی سئوسه،
منیم گؤزوم قؽزدادی.

گل تؤکمه قان، آ دیشلر،
قوش اوچار، قاناد ایشلر.
ایذین وئر، آغ بوخاقدا
قوی باتسین قانا دیشلر.

کیشمیر شالین منده‌دیر،
ایکی اوجو تنده‌دیر.
یۆز نوجاوان یؽغیلسا،
منیم گؤزوم سنده‌دیر.

صالح میندی قارا نر،
سۆسن، سۆنبول، قارانر.
دوغسا گۆنش جامالین،
شاه داغیندان قار انر.

آراخچی‌نین منده‌دیر،
سرمیشم، چمنده‌دیر.
عالم گؤزه‌له دؤنسه،
منیم گؤزوم سنده‌دیر.

من عاشیقم گۆله سر،
گۆل توتوبدو گۆلسر.
یار باغچایا گلمه‌سه،
بۆلبول کۆسر، گۆل اثر.

بو اوچان پروانه‌دیر،
قلبی شانه-شانه‌دیر.
من خبرسیز گلمیشم،
یار دل-دیوانه‌دیر.