بایاتی

گۆن اورتادا دایانار،
عالم نورا بویانار.
بیر بایاتی دئیرم،
یار یوخودان اویانار.

بو یول جاوادا گئدر،
دؤنر جاوادا گئدر.
اوچوبدو کؤنلوم قوشو،
گؤر نه هاوادا گئدر.

سو گلر، آستا گئدر،
آستابااستا گئدر.
ایلقارسیز قؽز یانینا
ساغ اولان خسته گئدر.

ککلیک داشدا نه گزر،
قلم قاشدا نه گزر؟
سن تک یاری اولانین
آغلی باشدا نه گزر؟

جئیرانلار قوشا گئدر،
گؤزله، اوخ بوشا گئدر.
یار ایلقارا دۆز اولسا،
عؤمور، گۆن خوشا گئدر.

بو ترلان سارا بنزر،
تۆکو ترلانا بنزر.
قوینونداکی ممه‌لر
گۆل تؤکموش نارا بنزر.

قوش اوچار دسته گئدر،
هره بیر سسده گئدر.
سنی گؤرن جاوانلار
ائوینه خسته گئدر.

دریا درین کیم اۆزر؟
سویو سرین کیم اۆزر؟
بیر وفالی یار اولسا،
اوندان الین کیم اۆزر؟

بو یول یولامی گئدر؟
مارال کولامی گئدر؟
اون بئشینی کئچن قؽز
ائوده یولامی گئدر؟

سو گلر باغا دگر،
گۆله، یارپاغا دگر.
من بیر جانان سئومیشم،
ج‍ۆمله تورپاغا دگر.

آراز آخار، یان گئدر،
اۆستونده مین جان گئدر.
یارامی یار باغلاسین،
یوخسا آخار، قان گئدر.

سو گلر داشا دگر،
کیرپیکلر قاشا دگر.
یارین بیر جۆت اؤپوشو
قوهوم-قارداشا دگر.

آشیق گئجه‌دن کئچر،
کاروان گئجه‌دن کئچر.
یارین فیکری، خیالی
گئجه منی دنگ ائدر.

سو گلر بنده دگر،
ککیل کمنده دگر.
سنده‌کی بو گؤزللیک
جمیع بو کنده دگر.

آغ دوه دۆزدن گئدر،
یۆکو تیفلیسدن گئدر.
اوغلانی درد آپارار،
درمانی قؽزدان گئدر.

عاشیق مینایا دگر،
هر گۆن مین آیا دگر.
قاشین کیمی قاش اولماز،
اۆزون مین آیا دگر.

باغلاردان آل بار، گؤندر،
سنده هر نه وار، گؤندر.
آچیلمامیش یاخاندان
ال دگمه‌میش نار گؤندر.

عاشیق یارادان دئیر،
بایقو یارا دان دئیر.
جانیم موشتولوق اولسون،
هر کیم یارا دان دئیر.

بو درد منی لنگ ائلر،
باشا وورار، دنگ ائلر.
سئوگی آدام اؤلدورمز،
سارالدار بدرنگ ائلر.

گؤزلرین کیمی گؤزلر؟
کیم بیلیر، کیمی گؤزلر؟
نه قاشین کیمی قاش وار،
نه گؤزون کیمی گؤزلر.