بایاتی

یان-یانا دوردوغوم یار،
چادیرین قوردوغوم یار.
گؤزللیکده تایین یوخ
قوربانی اولدوغوم یار.

من عاشیق آلتین اوولار،
گئجه‌نین آلتین اوولار.
بختور گۆل باشینا،
تر بوخاق آلتین اوولار.

آچ قوینون اۆشودوم یار،
لبیندن نوش ائدیم یار.
سن چور دئ، من جان دئییم،
تک سسین ائشیدیم یار.

عاشیق اودادا آغلار،
کابابی اودا داغلار.
یوز فیکریم وار، بیر عقلیم،
سنی گؤرجک اود آغلار.

پنجره‌دن باخان یار،
بولاق کیمی آخان یار.
گؤزله، گؤرن اولماسین،
آچیلیبدی یاخان، یار.

گۆل آچیب آرا باغلار،
توتولوب بارا باغلار.
عاشیقلار یۆز سؤز دئسه،
آخیرین یارا باغلار.

خومار-خومار باخان یار،
آ سولطان یار، آ خان یار.
آغلیم آلماق ایسته‌سن،
آچیق ساخلا یاخان، یار.

قارشیدا یارا باغلار،
بایقولار یارا باغلار.
یارامی یار باغلاسین،
یار یاخشی یارا باغلار.

آرخالیغی دیزدن یار،
اینجی‌ییبدی بیزدن یار.
آتان سنی دؤینده
گل قوینومدا گیزدن، یار.

بیچینچی بافا باغلار،
بیچدیکجه بافا باغلار.
بیر یار بی‌وفا چؽخسا،
اونا کیم بفا باغلار.

عزیزیم سینه باغلار،
خاللارین سینه باغلار.
گؤزللرده قایدادی،
اۆز اؤرتر، سینه باغلار.

وئریب باش-باشا داغلار،
دؤنوبدو داشا داغلار.
ترلان کؤنلوم قونوبدو
بیر قلمقاشا، داغلار.

داغلار باشی بوز باغلار،
دؤشونده یارپیز باغلار.
منی گلین اوخلاسا،
یارالاریم قؽز باغلار.

قارشیدا ایری داغلار،
دۆز داغلار، ایری داغلار.
گؤزون داغی دۆز چکر،
قاشلارین ایری داغلار.

ساوالانیم بوز باغلار،
دؤرد یانی یارپیز باغلار.
قاشین-گؤزون شنینه،
آشیق گلسه سؤز باغلار.

بو داغلار کاشی داغلار،
آغاردیب باشی داغلار.
منی حئیران قویوبدو
یاریمین قاشی، داغلار.

قارشیدا یاخشی باغلار،
مئیوه‌لی، یاخشی باغلار.
آشیغین سؽنیق کؤنلون
باغلاسا یاخشی باغلار.

ائل کؤچدو، موغان آغلار،
چکر شور، موغان آغلار.
شانه‌نین ظۆلم ایشیندن
عاشیق دئر: موی قان آغلار.

من عاشیقم آی باغلار،
آی باغچالار، آی باغلار.
قاشین، گؤزون تهرینده
هانسی اوستا یای باغلار.

توت آغاجین قؽردیلار،
اۆسته دیوار قوردولار.
یئنیئتمه قؽز اۆسته
دوققوز اوغلان قؽردیلار.