بایاتی

پنجره‌ده اۆزوم وار،
آنا، سنه سؤزوم وار.
قونشو اوغلانلاری‌نین
کیچی‌یینده گؤزوم وار.

من عاشیقم گۆله زار،
بۆلبوله زار، گۆله زار،
یارا قارشی گلنده
عاقیل چاشار، دیل آزار.

درویشم کشکولوم وار،
هر گۆلدن بئش گۆلوم وار.
گلمیشم من قاپینا،
البت بیر مۆشکولوم وار.

قامیش تالادان آزار،
یار گؤروب عقلیم آزار.
من بیر قؽزی سئومیشم،
تانری عؤمرومه یازار.

داغ دؤشونده قویو وار،
شیرین-شربت سویو وار.
آی قؽز، سنین قوینوندا
شامامانین بویو وار.

آتیم، توتوم آلما، یار،
ائوده یالقیز قالما، یار.
ال منیم، اتک سنین.
نظریندن سالما یار.

خانکندی‌نین دۆزو وار،
چؤللرینده دۆزو وار.
ایکی کؤنول بیر اولسا،
کیمین بونا سؤزو وار؟

ایشیم دۆشدو بنده، یار،
جان قالمادی تنده، یار.
الله منی اؤلدورسون،
سن ده قورتار، من ده، یار.

عزیزی‌یم، یا قارقار،
خاچین، ترتر، یا قارقار.
بیاز ممه، آغ سینه،
اوتانمازمی یاغار قار.

کؤنلوم قالدی سنده، یار،
طبیب یاردی، سن ده یار.
من سنه نئیله‌دیم کی،
کۆسوب گئتدین سن ده، یار!

عزیزینم یاغار قار،
اوینار بولود، یاغار قار.
گؤزو یولدا یاریم وار،
یا سؤیلنر، یا قارغار.

گۆل دۆزوبدو تئله یار،
اتک سانجیب بئله یار.
دردین آل، نازین گؤتور،
دۆشمز اله بئله یار.

منی تاپدی، آی آزار،
کاتیبلر آیه یازار.
داغیلدی بولود زۆلفون،
گۆن اۆزونه آی آزار.

قارشیمیزدا او دیار،
من دویمازام، او دویار.
گل مؤوجودون یولوندا،
پروانه تک اودو یار.

زنخدانین خالدی یار،
دیل-دوداغین بالدی، یار.
سنده‌کی بو گؤزللیک،
ماحالا سس سالدی، یار!

عزیزی‌یم، دریالار،
نه دریندی دریالار.
خوش او زۆلفون حالینا،
آغ بوخاقدان تر یالار.

اودون گؤتور، یاخشی یار،
یاخشی دوغرا، یاخشی یار.
ایگیدی گۆمراه ائیلر
قدیربیلن یاخشی یار.

باشیم آغریر، وای سالار،
اۆسته درمان قویسالار.
من سندن ال اۆزمرم،
تپه دؽرناق سویسالار.

کؤچ ائیله‌سین صنم یار،
قالسین سنده طعنه‌م یار.
سنی عالم سئوسه ده،
ازل سئون منم، یار.

عزیزیم بادامچالار،
گۆل آچیب بادامچالار.
زۆلفلرین شاهمار ایلان،
قورخورام آدام چالار.