بایاتی

سیرّ سؤزون منده قالسین،
سالدیم کمنده، قالسین.
جان منده قرار تاپماز،
قوی وئریم سنده قالسین.

سار گلسین داغا دولسون،
بۆلبوللر باغا دولسون.
سئودیگیم یار یولوندا
جانیم صاداقا اولسون.

چن آلیب داغلار باشین،
باغ باشین، باغلار باشین.
جامالین بیر آینادیر،
هر گؤرن باغلار باشین.

ایسته‌مه‌دیم یار اولسون،
نیشان آلدیم، آد اولسون.
یاردان منه خبر یاز،
منیم کؤنلوم شاد اولسون.

عاشیقم سینه قویون،
سیدریمی سینه قویون.
یاخشینی قیبله‌سینه،
منی ترسینه قویون.

عزیزیم آیدین اولسون،
آی دوغسون، آیدین اولسون.
ایکی حسرت قوووشدو،
گؤزلرین آیدین اولسون!

بو گلن جانین اولسون،
گلسین مئهمانین اولسون.
هارا گئتسن تئز قاییت،
جانیم قوربانین اولسون.

دانیشدی، دیندی زۆلفون،
گرده‌نه میندی زۆلفون.
دسته‌له قوی قوینونا،
قان ائیلر ایندی زۆلفون.

یار دیلی یئمیش اولسون،
دئدیگین دئمیش اولسون.
اینینده‌کی کؤینگین
یاخاسی گۆموش اولسون.

باغیندا مزه نوبار،
الینده گزه نوبار.
ایذین وئر آغ سینه‌ندن
دریم بیر تزه نوبار

شرابی ایچ، نوش اولسون،
پیالن گۆموش اولسون.
اگیل اۆزوندن اؤپوم،
یئری بنؤووش اولسون.

عزیزیم باغدادا وار،
مین آتین، باغدادا وار.
باغچادا گؤردوگون گۆل
بیزیم بو باغدا دا وار.

قوی داغلار تنده دورسون،
نیشان وئر، منده دورسون.
جان سنسیز قرار تاپمیر،
گؤندریم سنده دورسون.

عزیزیم مئیدانا وار،
مین آتین، مئیدانا وار.
یار بئله خومارلانیر،
بیلمیرم مئیده نه وار؟

من عاشیقم آی دورسون،
اۆلکر یاتسین، آی دورسون.
اؤلنده قبریم اۆسته
تئللرینی یای دورسون.

دور آتدان خالدانا وار،
مورغ اۆچون خال دانا وار.
عمه‌لی دیل، دوداقدی،
بوخاقدا خالدا نه وار.

من عاشیقم یان دورسون،
آت اوخونو یان دورسون.
زۆلفونه قاداغا دئ،
آغ اۆزوننن یان دورسون.

عزیزینم تکده وار،
داغدا اوتلار تک داوار.
آ جۆت یاتان بختور،
هئچ دئمیرسن تک ده وار.

عزیزیم سکسندیگون،
آی دوغدو، سکسندی گۆن.
جامالین بدیرلندی،
آی قورخدو، سکسندی گۆن.

من عاشیق، خالخ آنا وار،
خال دۆشموش، خالخانه، وار.
گؤز گؤردو، کؤنول سئودی،
بیلمنم خالخا نه وار.