بایاتی

سن ناریمسان، من گیلن،
باغچامیزدا اکیلن.
هر گۆن دیوار دالیندان
منم باخیب چکیلن.

عزیزیم هارایچی من،
جارچی من، هارایچی من.
ممه‌لر ساواشاندا
اولایدیم هارایچی من.

گئدیردیم جان-باش ایلن،
یولوم دۆشدو داش ایلن.
یار اؤز درد-دیلینی،
بیلدیردی گؤز-قاش ایلن.

نه دئسن قانیرام من،
سنی یار سانیرام من.
منه اود نه گرکدی،
اودسوز دا یانیرام من.

قالمیشام ائشیکده من،
بیر قؽزیل بئشیکده من.
یار باغچایا گلنده
دورارام کئشیکده من.

عاشیقم یانیرام من،
هر سؤزو قانیرام من.
یۆز مین گؤزل یؽغیلسا،
یاریمی تانیرام من.

عزیزی‌یم گۆنده من،
کؤلگه‌ده سن، گۆنده من.
ایلده قوربان بیر اولار،
سنه قوربان گۆنده من.

دونام کی، گئییلم من؟
یار گؤردوم اگیلم من؟
منه بی‌وفا دئمه،
ایلقارسیز دئییلم من.

عزیزی‌یم درده من،
دؤزممرم درده من.
سن یات دینجین آلگیلن،
کئشیکچینم درده من.

خستن منم، خستن من،
باغچادا گۆلدستن من.
سن ائله بیر چیچکسن،
هر گؤرنده مستم من.

من عاشیقم، گؤزه من،
قاشلارا من، گؤزه من.
اوو وورولار اوخلارا،
وورولموشام گؤزه من.

دارچی‌نین لۆله‌سیندن،
دولان گل بئله‌سیندن.
گۆنده بیر قوربان کسیم
گؤزومون گیله‌سیندن.

پئیمان توتدوم سؤزه من،
گلیب چؽخدیم دۆزه من.
باغلامیشام کؤنلومو
خومار باخان گؤزه من.

دان یئری ضیادا سن،
اسدیکجه زیاد اسن.
کسرم، دیلیم، سنی،
نه دئدین، ضیاده سن؟

گؤی اۆزونده پرده‌سن،
سالدین منی درده سن.
من سنی چوخ سئویرم،
گؤیده الله، یئرده سن.

ائللرین گؤزه‌لیسن،
دادلیسان، مزه‌لیسن.
الیم سندن اۆزمرم،
سئودامین ازلیسن.

هله ترسن، تزه‌سن،
باغ-باغچانی بزه سن.
بیله‌سن وفاسینی،
یولوندا جان اۆزه‌سن.

خوش گلدین صفا گلدین،
بیزه هم صفا گلدین.
نه من اؤلدوم قورتاردیم،
نه سن اینصافا گلدین.

عزیزی‌یم اۆزه‌سن،
اۆربند سالما اۆزه سن.
گیره‌سن یار باغینا،
بیر جۆت نارین اۆزه‌سن.

هارای سئومه‌لی گلین،
سئچیب یئمه‌لی گلین.
خلوتده بیر سؤزوم وار
سنه دئمه‌لی، گلین.