بایاتی

سنه قوربان آی اوغلان،
منه وئر سن های، اوغلان.
گزدیم ائل-اوبانی،
یوخدور سنه تای، اوغلان.

قؽزیل اۆزوک تاخمازسان،
سن قؽزیلا باخمازسان.
هانسی چایین سویوسان،
هر طرفه آخمازسان؟

قارا بوروقساچ اوغلان،
قاپیمیزی آچ، اوغلان.
آتام، آنام یاتیبدیر،
گؤتور منی قاچ، اوغلان.

عزیزیم هارالیسان؟
گنجه‌نین مارالیسان.
گئتمه گؤزوم اؤنوندن،
گؤزومون قارالیسان.

کؤینگین یاشیل اوغلان،
گئیین، یاراشیر اوغلان.
گلمه بیزیم مهله‌یه،
آنام دالاشیر اوغلان.

آی گلن، هارالیسان؟
اۆرکدن یارالیسان.
گؤزلریندن تانیرام،
بو یئرین مارالیسان.

من عاشیق حارامیسان،
زۆلفلرین دارامیسان.
گؤزل اولماسان دا سن،
کؤنلومه یارامیسان.

گئتمرم ائلینیزدن،
دویمارام دیلینیزدن.
اوللام یاشیلباش سونا،
اوچارام گؤلونوزدن.

سن بو یئرین جانیسان،
سولطانیسان، خانیسان.
عطریندن دویماق اولماز،
تبریزین رئیحانیسان.

آشیغا گؤزوموزدن،
کابابا کؤزوموزدن.
خالدان، زۆلفدن دویسا دا،
دویمادی گؤزوم اۆزدن.

یارپاق تک اسن اولسان،
ساچباغین کسن اولسان.
عزرائیل منه نئیلر،
باشیم اۆسته سن اولسان.

بوراخ گئتسین غم الدن،
قویما دۆشسون دم الدن.
گئدیر اؤز جانیم گئتسین،
گئتمه‌سین همدم الدن.

عزیزی‌یم آییمسان،
اولدوزومسان، آییمسان.
سالما منی گؤزوندن،
سن کی منیم پاییمسان.

باغچالاری قندیلدن،
کؤینگی وار مندیلدن.
یار ایله مرج گلمیشیک،
او دوداقدان، من دیلدن.

آی قؽز، منیم پاییمسان،
گؤی اۆزونده آییمسان.
من سنی چوخ ایسترم،
یاخشی منیم تاییمسان.

عاشیقم سنا دیلدن،
اوخورام سنا دیلدن.
حاشا کی من مظلوما،
ظۆلم اولا سن عادیلدن.

تاپمادین تای منیمچون،
وئرمه‌دین های منیمچون.
من اؤلسم، سنه قوربان،
سن اؤلسن، وای منیمچون.

عزیزیم گۆلو گۆلدن،
خبر آل گۆلو گۆلدن.
جانان گۆللر ایچینده،
سئچمرم گۆلو گۆلدن.

عاشیقم اۆزه‌سن جان،
زۆلفونه دۆزه‌سن جان.
بیلسن یار وفالیدیر،
یولوندا اۆزه‌سن جان.

عاشیق یاخشی‌یا مندن،
دۆررون یاخشی یمندن.
سلام، دوعا، تمنّا
آپار یاخشی‌یا مندن.