بایاتی

آشیغام او یاتینجان،
من یانیم او یاتینجان.
کسیم یاسدیغین دیبین،
یالواریم او یاتینجان.

عاشیقم آلما مندن،
داغ سندن، آلما مندن.
درمانین سنین اولسون،
تک دردین آلما مندن.

عزیزیم سایما مندن،
اومان وار پای ممندن.
اولایدیم املیک قوزو،
امیدیم هئی ممندن.

عزیزیم چینی چیندن،
ماچی‌نین چینی چیندن.
تۆجّار چکمیش زۆلفونو،
کئچیرمیش چینی چیندن.

گل عاشیق دؤنمه مندن،
وئر طیفله دؤن ممندن.
دوروب ساللانماق سندن،
بویونا دؤنمک مندن.

عزیزی‌یم زۆلفوندن،
ندن سالیب زۆلفون دن؟
شاهمار گلسه قورخمانام،
گؤزله منی زۆلفوندن.

عزیزی‌یم جان مندن،
جیسیم مندن، جان مندن.
کامان، اوخ سندن اولسون،
هدف مندن، جان مندن.

عزیزی‌یم یۆز یئردن،
اللی یئردن، یۆز یئردن.
قوللارین سال بوینوما،
آیاقلارین اۆز یئردن.

یولون سال یئله‌سیندن،
دولان گل بئله‌سیندن.
گۆنده بیر قوربان کسیم
گؤزومون گیله‌سیندن.

عزیزی‌یم یۆز یئردن،
اللی یئردن، یۆز یئردن.
جامالین بایرام آیی،
باخیشیرلار یۆز یئردن؟

اومان وار پای لبیندن،
هئچ اولماز تای لبیندن.
اولایدیم سو تشنه‌‌سی،
امیدیم آی لبیندن.

عزیزیم مینا گردن،
مینا بوی، مینا گردن.
یئلدن، کۆلکدن قورون،
قورخورام سؽنا گردن.

کۆر بولانیر لیلیندن،
باش آچمیرام دیلیندن.
سن یایلاقدان قار گؤندر،
من آرازبار گۆلوندن.

بیر قوشوم وار سرگردن،
خبر وئریر هر یئردن.
آغلیمی باشدان آلیب،
بیللور بوخاق، آغ گردن.

عزیزیم گدی‌ییندن،
آی دوغدو گدی‌ییندن.
او یارا قوربان اولوم،
دؤنمز اؤز دئدیگیندن.

گمیم گلدی صفردن،
سوراق وار بیر نفردن.
باغچامیزا یار گلیب،
خبریم یوخ خبردن.

من عاشیق دویمه‌سیندن،
آچ علمه دۆیمه‌سیندن.
توتایدیم آغ ممندن،
امیدیم دۆیمه‌سیندن.

آشیق گلیر ساز ایلن،
اؤردک ایلن، قاز ایلن.
یار منی یولا سالدی
غمزه ایلن، ناز ایلن.

بولاغین باشی ایلن،
دیبی‌نین داشی ایلن.
سنه قلبیمی آچدیم
گؤزومون یاشی ایلن.

عزیزیم هارایچی من،
جارچی من، هارایچی من.
یار بو گۆن سئیره چؽخیب،
هارای گۆل، هارای چمن.