بایاتی

عزیزی‌یم گئنه سن،
صفا گلدین گئنه سن.
فیکریم، ذیکریم، خیالیم،
سنسن، سنسن، گئنه سن.

عزیزی‌یم بیر آمین،
بیر دوعا دئ، بیر آمین.
بو گۆندن محبّتیم
آرتیب سنه بیره مین.

عزیزی‌یم زیره‌سن،
ظفرانسان، زیره‌سن.
قوربان اولوم او گۆنه،
بیر قاپیمدان گیره‌سن.

عاشیقم اودا سنین،
دۆشه‌لی اودا سنین.
یئتیمین بیر جانی وار،
دیلرسن، او دا سنین.

ائلات کؤچور، آتدان سن،
گؤزله اؤزون یاددان سن.
دیلیمین ازبریسن،
هئچ چؽخمازسان یاددان سن.

اۆزونده خالدی سنین،
یاناغین آلدی سنین.
شیرین شربت یانیندا
لبلرین بالدی سنین.

اینجه‌سن اینجیدن سن،
صدفدن، اینجیدن سن.
کسرم، دیلیم، سنی،
بیلم یار اینجیدنسن.

آی قؽز، آدین وار سنین،
مئیخوش دادین وار سنین.
هامی سنی چوخ سئویر،
یوخسا جادین وار سنین؟

شوخسان، مزه‌لی سنسن،
ائلین گؤزه‌لی سنسن.
منیم ناکام باختیمین
سونو، ازلی سنسن.

قامتین شوخدو سنین،
الینده اوخدو سنین.
من سنی چوخ سئویرم،
خبرین یوخدو سنین.

عزیزیم دیلی شیرین،
بۆلبولون دیلی شیرین.
منه بیر سیرّ وئریبدی،
بال دوداق، دیلی شیرین.

الینده آینا بونون،
توتوبدو آینا بونون.
دیلین، دیشین، دوداغین،
یئیه‌سن آی نه بونون.

عزیزیم بینه گلسین،
کؤچ گلسین، بینه گلسین.
سئودیم ترسا قؽزینی،
آند وئرین دینه گلسین.

الینده آی نه بونون،
قاشلاری یای نه بونون.
توتاسان آغ ممه‌سین،
سؽخاسان آی نه بونون.

عزیزیم سارا خالین،
جان آلیر هارا خالین.
اۆرگیمه خال سالدی،
آغ اۆزده قارا خالین.

عزیزیم منده مونون،
نیی وار منده مونون.
اؤزو جنّت چیچه‌یی،
کؤثری من ده مونون.

آشیق تاپار، من زامین،
آتین چاپار، من زامین.
یارا شفا درمانی
کؤنلوم، آپار، من زامین.

قافتانیدی آل مونون،
کؤبه‌سیدی شال مونون.
شئیطان داغداغا ائیلر،
دور قاداسین آل مونون.

بوز آتین بویلاماسین،
چک باشین، اویناماسین.
گلیرسن، گئجه‌دن گل،
اۆرگیم اویناماسین.

ایستکانین آغ اولسون،
ایچی دولو یاغ اولسون.
اوغلان، خیففت ائیله‌مه،
منیم جانیم ساغ اولسون.