بایاتی

فلکین چارخی دؤنسون،
سو گلسین آرخی دؤنسون.
لبلریندن اؤپوش وئر،
آغزیمین تالخی دؤنسون.

گئتمه، یاد ائلده نه وار؟
گردنده بئلده نه وار؟
نه وار آغ بوخاقدا وار،
اؤپمه‌لی تئلده نه وار؟!

من عاشیقم، گنجه وار،
شکی، شیروان، گنجه وار.
یار یاردان آیریلسا دا،
محبّت اؤلونجه وار.

ائله‌می، غمه‌سی وار،
بئلینده غمه‌سی وار.
مینمیشم عشق آتینا،
اولموشام غمه سووار.

من عاشیق داغدا نه وار،
ائل کؤچموش، داغدا نه وار.
نه گزیر دلی کؤنلوم،
سئوگیسیز داغدا نه وار؟

بۆلبول اوخور سسی وار،
هم زیلی، هم پسی وار.
شیرین سؤزلو دیلبرین
جان آلان غمزه‌سی وار.

قؽزیلگولده دنه وار،
دریلدیکجه یئنه وار.
باش قویوم دیزین اۆسته،
تر تؤکولسون دنوار.

شاه داغی‌نین قاری وار،
اۆرکده آه زاری وار.
یارین نه درد-غمی،
منیم تکین یاری وار.

بو قارا اۆزده نه وار؟
یاد دئین سؤزده نه وار؟
گؤزل گؤرمک ثاوابدیر،
قوی باخیم، گؤزده نه وار؟

باشیندا آغ شالی وار،
یاشیلی وار، آلی وار.
جئیران یئریشلی یارین
آغ بوخاقدا خالی وار.

باغیندا، شیرین، نه وار؟
یئمه‌لی شیرین نه وار؟
گزسن ج‍ۆمله جاهانی،
سئوگیدن شیرین نه وار؟

الینده بایداسی وار،
بایدانین قایداسی وار.
الینی وئر الیمه،
جانیما فایداسی وار.

قارشیدا گؤز ایزی وار،
کابابدا کؤز ایزی وار.
اۆزونه یادلار باخمیش،
اۆزونده گؤز ایزی وار.

داغ باشیندا سارای وار،
سارایدا نه هارای وار؟
قاشین، گؤزون تیمسالی
نه اولدوز وار، نه آی وار.

داغدا دومان یئری وار،
قاشدا کامان یئری وار.
بیر جۆت نار ایتیرمیشم،
منده گۆمان یئری وار.

دانیشماغا هئییم وار،
الیفیم وار، بئییم وار،
یارا قوربان جان اولسون،
جاندان عزیز نییم وار؟

آراشقی‌نین زری وار،
بوتاسی وار، زری وار.
خومار باخان گؤزلرین
اولدوزا بنزری وار.

الیمده قفسیم وار،
ساخلارام هوسیم وار.
ائله سنی دئیرم،
نه قدر نفسیم وار.

باغیندا آغ اۆزوم وار،
گئتمه دایان، سؤزوم وار.
گؤزلریندن قورخورام،
قاشلاریندا گؤزوم وار.

قارشیمیزدا لالزار،
ندن چکدین ناله، زار؟
بو گلن جانان اولدو،
دخی چکمه، لاله، زار.