بایاتی

من گلیردیم بولاقدان،
یاریم چؽخدی قاباقدان.
یالواردیم، آخیر آلدیم
بیر اؤپوش بال دوداقدان.

آری دویماز بالیندان،
گؤزل چؽخماز شالیندان.
اۆستومه نور تؤکولدو،
یارین آی جامالیندان.

یارالی‌یام یانیمدان،
قوشلار ایچر قانیمدان.
سن منه قوربان دئدین،
من ده کئچدیم جانیمدان.

من عاشیق ایلقاریندان،
سؤزوندن، ایلقاریندان.
یارینا ایلقار وئرن
دؤنرمی ایلقاریندان؟

اززی‌یم او دیواننان،
او خاننان، او دیواننان.
اۆز گؤرمز، رۆشوت آلماز،
قورخورام او دیواننان.

قاشلارین قاراسیندان،
اؤپیدیم آراسیندان.
آیریلماق نئجه اولسون
فیلانکس بالاسیندان؟

آی دوغور تالیستاندان،
گۆن قالخیر گۆلوستاندان.
بیر جۆت شاماما دردیم
یار بسله‌ین بوستاننان.

گلیشین آزاتتاردان،
خبر وئر آزاتتاردان.
عاشیق، دردینه درمان
تاپیلیر آز عطّاردان.

قورون سنه باخاندان،
چایلار کیمی آخاندان.
گیزله‌مه شوخ ممه‌نی،
قوی گؤرونسون یاخاندان.

عزیزی‌یم آل بوندان،
یاناخ بوندان، خال بوندان
شئیطان وسوه‌سه وئریر،
دور بیر اؤپوش آل بوندان.

گلیشین آی آغسودان،
خبر وئر، آی آغ سودان.
سونانی گؤلده گؤردوم،
کسمنم آیاق سودان.

بازاردا وار قول آلان،
کۆل باشینا دول آلان!
همیدان بختوردیر،
قؽز الیندن گۆل آلان.

من گلیردیم ایراخدان،
چؽخدی گۆلوم بولاخدان.
گۆلوم، بیرجه سورایدیم
بال سۆزولن دوداخدان.

آی چؽخدی پئشمان-پئشمان،
گۆن چؽخدی اونا دۆشمان،
گل خلوتده گؤروشک،
نه دوست بیلسین، نه دۆشمان.

من عاشیق اودا گیر یان،
من گیریان، او دا گیریان.
دئدیم، کؤنلوم، اودون آل،
دئمه‌دیم، اودا گیر، یان.

دولان گل بیزه، جئیران،
زۆلفون تؤک اۆزه، جئیران.
قورخمورسان یاد اووچودان،
چؽخیرسان دۆزه، جئیران؟!

چپری باسما، اوغلان!
یولومو کسمه، اوغلان!
من اؤزگه‌نین مالی‌یام،
هله تلسمه، اوغلان!

اززی‌یم گؤزه جئیران،
سۆرمه چک گؤزه، جئیران.
چوخ ترلان اوولامیشام،
گؤرونمور گؤزه جئیران.

سؤز-صؤحبتی ناز، اوغلان،
کئیف-داماغی ساز، اوغلان.
اؤزون گله بیلمه‌سن،
نه سؤزون وار یاز، اوغلان!

آلما وئرسم، آلمازسان،
سن آلمادان قالمازسان.
هانسی باغین گۆلوسن،
سارالمازسان، سولمازسان؟!