بایاتی

دومانی چن بیلرم،
کؤلگه‌نی سن بیلرم.
گئجه گل گیر یانیما،
ترله‌سن من سیلرم.

قؽزیلگولو دررم،
پنجره‌یه سررم.
وفالی بیر یار اولسا،
یولوندا جان وئررم.

آرخالیغین بیچمیشم،
تیکمه‌یه آند ایچمیشم.
بیزیم بو بالاکندن
شۆمال بویو سئچمیشم.

سو گلدی باغا نئیلیم؟
دگدی یارپاغا نئیلیم؟
گؤروشوروک باغچادا،
گلمیر اوتاغا نئیلیم؟

قؽزیلگولو بیچمیشم،
اۆستونده آند ایچمیشم.
مین گؤزلین ایچیندن
بیرجه سنی سئچمیشم.

باغا سو دوشدو نئیلیم؟
آغاجلار ایچدی نئیلیم؟
مۆژگان اوخونو آتدین،
قلبیمدن کئچدی نئیلیم؟

ائلدن یانا دۆشموشم،
ناحق قانا دۆشموشم.
یار منی برکه چکیب،
ایمتاحانا دۆشموشم.

عاشیقه او یار منیم،
غم باغریم اویار منیم.
مکّه‌مدی، مدینمدی،
کعبه‌مدی او یار منیم.

بو یولدان ایشله‌یه‌یدیم،
خنجر گۆموشله‌یه‌یدیم.
عشق ایله یاری سئویب،
اۆزوندن دیشله‌یه‌یدیم.

آلچا گۆل آچدی، نئینیم؟
دیلیم دولاشدی، نئینیم؟
بیر آلاگؤز یار سئودیم،
خیالیم چاشدی، نئینیم؟

بو گئجه سیزه گلدیم،
پنجرنیزه گلدیم.
باسدیغینیز تورپاغا
قاپاندیم، دیزه گلدیم.

آشیق، سۆزگون گؤزلریم،
غمدن اۆزگون گؤزلریم.
گؤزلدن دویا بیلمز،
باخسا یۆز گۆن گؤزلریم.

تور گؤردوم، تله بیلدیم،
چاغیردین، گله بیلدیم.
بیر یاتمیش جئیران گؤردوم،
یار یاتیب ائله بیلدیم.

یانان چؽراق اولایدیم،
یولدان ایراق اولایدیم.
یاریم بیچین بیچنده
سویوق بولاق اولایدیم.

سنی بۆلبول بیلردیم،
ساری سۆنبول بیلردیم.
باغچامیزدا آچیلمیش
بیر قؽزیلگول بیلردیم.

داغ اۆسته ساری باخدیم،
تار گؤردوم، هارا باخدیم.
بیر دفعه اۆزون گۆلسه،
آچیلار قارا باختیم.

من عاشیق، اۆزه مردیم،
دریادا اۆزه مردیم.
من ده قارا گئیسه‌یدیم،
زۆلفون تک اۆز امردیم.

عزیزیم نئینن آلیم،
الیفی بئینن آلیم.
کۆسدوروب یولا سالدیم،
کؤنلونو نئینن آلیم؟

باغلاریندا بار خانیم،
هئیوا خانیم، نار خانیم.
عاشیق بیر دیلبر گؤروب،
چاغیریرلار نارخانیم.

دریادان بالیق توتدوم،
توتوب، گۆنده قوروتدوم.
بیر وفالی یار تاپدیم،
بی‌وفانی اونوتدوم.