بایاتی

آراز دئییلم، جوشام،
کۆر دئییلم، قایناشام.
آپار صرّاف یانینا،
گؤر نه قیمتلی داشام.

شیرین چایین قندی‌یم،
زۆلفلرین کمندی‌یم.
عالم توفانا گئتسه،
گؤزلری‌نین بندی‌یم.

یاری یولا سالمیشام،
قایغی‌سینا قالمیشام.
من یاریمین ایگینی
باجی‌سیندان آلمیشام.

عزیزینم بسته‌یم،
الینده گۆلدسته‌یم.
خبر آلسان حالیمی،
من سنینچون خسته‌یم.

تندیره داش قویموشام،
اۆسته لاواش قویموشام.
گۆندوز گلمه، گئجه گل،
بؤیرومو بوش قویموشام.

من داغلاردا چیچه‌یم،
ال وورما، کؤینکچه‌یم.
یار کی منی بگنیر،
گؤیچکلردن گؤیچه‌یم.

قاپی‌یا داش قویموشام،
قاش اۆسته قاش قویموشام.
اؤللم، سندن دؤنمنم،
یولوندا باش قویموشام.

قؽزیلگول دسته‌سی‌یم،
قاشلارین اوستاسی‌یام.
اؤزگه بیر دردیم یوخدو،
جامالین خسته‌سی‌یم.

درد الیندن سولموشام،
ساچ-بیرچه‌ییم یولموشام.
آخیر بو عشق اودوننان
اریییب موم اولموشام.

آی قؽز، سنه مایلم،
بوینوندا همایلم.
دوست پایی شیرین اولار،
هر نه وئرسن قایلم.

عزیزیم داغا گللم،
باغچایا، باغا گللم.
قؽش گۆنو یار گؤزله‌سه،
قار یاغا-یاغا، گللم.

قارشیدا اینجی منم،
لعل منم، اینجی منم.
وفالی یار یولوندا
جان وئرسم، اینجیمنم.

عزیزیم من ده گللم،
میننم سمنده، گللم.
قوشوللام چاروادارا،
سیز اولان کنده گللم.

من عاشیق اینجیمنم،
دۆرر منم، اینجی منم.
باش قویوب دیزین اۆسته
جان وئرسم، اینجیمنم.

کیرپیکلرین سان بیللم،
منی کلبه سان، بیللم.
عاشیق دئر، آیریلیقدان
اؤلومو آسان بیللم.

داغلارین قاری منم،
اریمز قاری منم.
بیر آلاگؤز دیلبرین
قانلی‌سی، قاری منم.

اووچویام، تکله‌دنم،
تک ائولی تکله‌دنم.
آرازبار ترلانی‌یام،
سونالار تکله‌دنم.

تبریز منم، خوی منم،
گؤزلریندن دویمانام.
وئرسه‌لر دۆنیا مالین،
سنی الدن قویمانام.

من عاشیق او گۆله نم،
زۆلفلرین او گۆله نم.
قرآن گتیر، آند ایچیم،
سنینله او گۆلنم.

باغچالاردا گۆل منم،
بۆلبول منم، گۆل منم.
سۆبهدک یالوارماسان،
دانیشمانام، گۆلمنم.