بایاتی

نال ایسته‌سن، منده نال،
سن آتین آل، من ده نال.
سینه‌م عطّار دۆکانی،
نه ایسته‌سن مندن آل.

دؤولتین، وارین گؤزل،
واردی بیر یارین گؤزل.
شیریندی هر مئیوه‌دن
قوینوندا نارین، گؤزل.

داغلارین باشینا گل،
دیبی‌نین داشینا گل.
آی قؽز، آنان قویماسا،
یاشینا-یاشینا گل.

عاشیقه یاز، اینجه گۆل،
گؤروبدو یاز اینجه گۆل.
بۆلبول یۆز کیتاب اوخور
بیر الیف یازینجا گۆل.

قارشیمیزدا یۆزن گل،
سونا، گؤلده یۆز، ان، گل.
یاریم وفالی اولسا،
مانا نئیلر یۆز انگل.

عزیزیم رئیحانی گۆل،
شاهی گۆل، رئیحانی گۆل.
گۆلون کیمی گۆل بیتمز،
گؤتورسه جاهانی گۆل.

زۆلفون سیاه، یۆز، یۆز ایل،
عؤمرون اولسون یۆز، یۆز ایل.
عاشیق سندن یۆزولمز،
سن عاشیقدن یۆز یۆزیل.

عزیزی‌یم قانلی گۆل،
قانلی سئویش، قانلی گۆل.
یئمیش بۆلبول باغرینی،
چؽخمیش آغزی قانلی گۆل.

بو مئشه مئشه دئییل،
گۆلو بنؤوشه دئییل.
اؤپنده لبیندن اؤپ،
گؤز اؤپمک پئشه دئییل.

عزیزی‌یم یاخشی گۆل،
یاخشی دانیش، یاخشی گۆل.
بۆلبول اۆرکدن اوخور،
باغدا گؤرسه یاخشی گۆل.

آراشقی‌نین آل یاشیل،
چایدا بالیق قایناشیر.
یارین سسی گلنده
ائوده قانیم قایناشیر.

عزیزی‌یم اویان گۆل،
او یان بۆلبول، او یان گۆل.
باشین یاستیق اینجیدر،
گل سینه‌مه دایان گۆل.

آرخالیغین چین یاشیل،
باخدیقجا گؤز قاماشیر.
چؤلدن سسین گلنده
ائوده دیلیم دولاشیر.

عاشیق یامانجا دؤگول،
خالین یامانجا دؤگول.
گۆنوموز بئله کئچسه،
منه یامانجا دؤگول.

من عاشیقم باغدا گۆل،
باغچادا گۆل، باغدا گۆل.
دیللرده بیر دیلبردی،
اونا چاتماز باغدا گۆل.

سن اولدوزسان، من آیام،
سای قوشلاردان من سایام.
مجنون کیمی گزرم،
لئیلی مۆشتاغیندایام.

نه دوروبسان بسته گۆل،
حالین یوخسا خسته، گۆل.
من یاریما سؤز آتدیم،
یاریم منه دسته گۆل.

قارداش، بئلین باغی‌یام،
آیاغین تورپاغی‌یام.
اۆزونده بیر گۆل بیتیب،
من اونون یارپاغی‌یام.

الینده سازا یاننام،
غمزه‌یه، نازا یاننام.
باش قویوب دیزین اۆسته
قؽش یاتسام، یاز اویاننام.

بۆلبولو آج ساخلارام،
گۆلدن بیر تاج ساخلارام.
یاریم اوتانجاق اولسا،
توتوب دیلمانج ساخلارام.