بایاتی

داغلارین چوخدو قاری،
سریندی بولاقلاری.
ایذین وئر آغ سینه‌نه
باش قویوم، یاتیم، باری.

گئیینیبدی یار ساری،
بایقو ایله یار ساری.
کعبه‌ده اؤلسه عاشیق،
یؤنون قویون یار ساری.

بازارین شاه بازاری،
قورولموش شاه بازاری.
عاشیقین شان باغریندان
قووولموش شاهباز آری.

میس قازانین پاخیری،
اوغلان، قایتار ناخیری.
سن منیمسن، من سنین،
بودو سؤزون آخیری.

آرازین قؽراخلاری،
دولو گلیر آرخلاری.
شئه دۆشموش گۆله بنزر
یاریمین دوداخلاری.

اززی‌یم یازدان آیری،
قلم کاغیذدان آیری.
آیریلسین، نئجه دؤزسون
بو گؤز او گؤزدن آیری.

بیزیم ائوین قوشلاری،
قؽزیلدان سرپوشلاری.
قؽزلار سئیره چؽخاندا
آلیر باشدان هوشلاری.

زرخارادان لیباسی،
گئی ساللان، اولما آسی.
منی یاندیردی یاخدی
گؤزلری‌نین قاراسی.

ائل کؤچور داغا ساری،
اوجادیر داغ حاصاری.
اۆرگین نار ایسته‌سه،
دولان گل باغا ساری.

الینده یار آلماسی،
توتوبدو یار آلماسی.
یاخشی اولار یار کؤنلون
کۆسنده یار آلماسی.

گئدیردیم باغ آراسی،
تاپدیم بیر گۆل پاراسی.
بیر قؽز گؤردوم، قلبیمین
تزه‌لندی یاراسی.

گۆلگزین گۆل آداشی،
مئی داشی، گۆله داشی.
یؽخار بۆلبول اؤیونو،
کیم آتسا گۆله داشی.

قاشلاری‌نین قاراسی،
سنسن باغریم پاراسی.
بیر اوغلان، بیر قؽز اولا،
بیر گۆللو باغ آراسی.

آشیق گزر داغ-داشی،
آختارار یاشیلباشی.
جان آلان بیر گؤزلین
سۆرمه‌نی نئیلر قاشی؟

اینینده وار خاراسی،
آل-یاشیلی، قاراسی.
منی درده سالیبدی،
اۆزو بیر آی پاراسی.

آشیق یاخشیدی یاخشی،
خالین یاخشیدی، یاخشی.
صرّاف باخدی، بگندی،
دئدی: یاخشیدی یاخشی.

قؽزیل اۆزویون خاصی،
سیلیندی کؤنلوم پاسی.
آغلیمی باشدان آلدی
بو ظالیمین بالاسی.

سن یاخشی، من ده یاخشی،
سو گلیر بنده یاخشی.
ایمران دیللی عاشیقی
سالیبدی بنده یاخشی.

بنؤوشه گۆللر خاصی،
ندی اونون باهاسی؟
قؽزیلگولدن دون بیچدیم،
تر قؤنچه‌دن یاخاسی.

آرخالیغین ناخیشی،
گؤزلدی یار باخیشی.
گزه‌سن شک-شیروان،
تاپمازسان مندن یاخشی.