بایاتی

عزیزیم، خان دیوانی،
خان ائیلر خان دیوانی.
یارا بیر ائیوان تیکدیم،
قؽزیلدان نردیوانی.

من عاشیق اوبا هانی؟
ائل هانی، اوبا هانی؟
یا اؤللم، یا اؤلدوررم،
من آللام او باخانی.

بو دیوان خان دیوانی،
خان ائیلر خان دیوانی.
گؤزلرین قوربانی‌یام،
قاشلارین بندیوانی.

اززی‌یم سو جاهانی،
ساچین تک سوجا هانی؟
لبلرین تشنه‌‌سی‌یم،
گؤتورسه سو جاهانی.

قؽزیل اۆزوک میانی،
بارماقلارا دایانی.
بئلیمی قوجان اوغلان،
تئز گئت، آتام اویانی.

گؤزو گؤردو اژدهانی،
کعبه تک سژده هانی؟
دویماز یاخشی لبیندن
عاشیقین اژ دهانی.

قؽزیل اۆزویون یانی،
دورماز بارماغیم قانی.
نیه بیزه گلمیرسن،
دیل-دوداغین قوربانی.

بولود کئچدی، آی هانی؟
قاشین کیمی یای هانی؟
سنه اوخشار یار گزدیم،
ائلده سنه تای هانی؟

قارا آتین یالمانی،
گؤیه آتدیم آلمانی.
اویناتماغا ایستردیم،
قوینونداکی آلمانی.

بۆلبول هانی، گۆل هانی؟
بۆلبول گۆلون مئهمانی.
گلدیم سنی گؤرمه‌یه،
دانیشماغا دیل هانی؟

گؤز گؤردو سن جانانی،
وئر منه سنجه نانی.
کؤنول الدن قویارمی
گؤز قویسا سن جانانی؟

عزیزیم هارا جانی،
من قویوم هارا جانی؟
بیلسم مۆشتاغیندادی،
تاپشیررام یارا جانی.

عزیزیم، اوبا خانی،
ائل خانی، اوبا خانی.
کیرپی‌یین اود کیمیدیر،
گل وورما او باخانی.

سئیر ائتدیک سایریجانی،
بیانی، سایریجانی.
شریف پئشکش گؤندردی
جانانا سایری جانی.

بگلر، خانلار نیشانی،
قوبا بالی‌نین شانی.
گؤزل اونا دئییرلر،
چکمیر اننیک-کیرشانی.

باغیندا یارپاق ساری،
گۆل ساری، یارپاق ساری.
یار الیندن یارام وار،
گل یاراما آغ ساری!

اززینم، گۆلم باری،
چکیلیر گۆل عنبری.
نه گۆلن، گۆلدورندی،
نه قویمور گۆلم باری.

آرخالیغین آجاری،
گئی، یاراشیر آجاری.
لبین تکی بال اولماز،
منیم تکی آج آری.

داغلاری گل ائن باری،
چکیلیر گۆل عنبری.
خالقدا وار دسته-دسته،
بیزده وار گۆل آنباری.

باغیندا اۆزوم ساری،
یئمه‌لی اۆزوم ساری.
یارا گلن قادانی
چکرم اؤزوم ساری.