بایاتی

باغچالاردا باد قالدی،
دوست چکیلدی، یاد قالدی.
یار قیسمتیم اولمادی،
اۆستومده بیر آد قالدی.

عزیزی‌یم نه قاندی،
نه غوغادی، نه قاندی.
قاشلارین یاغی، جلّاد،
گؤزلرین اویناغاندی.

یاغیش یاغدی، نم قالدی،
سئوگی، صؤحبت دم قالدی.
قوینونداکی شاماما
ال دگمه‌میش، خام قالدی.

من عاشیقم اۆز قاندی،
سینه قاندی، اۆز قاندی.
خال اؤپمک بیر قان اولسا،
بوخاق اؤپمک یۆز قاندی.

باغیندا اۆزوم قالدی،
یئمه‌دیم، اۆزوم قالدی.
ایکی عمی قؽزی‌نین
بیرینده گؤزوم قالدی.

اوغلان، آدین فیرقاندی،
هر باخیشین بیر قاندی.
ائله بیلدیم سن گلدین،
سۆموکلریم یؽرغاندی.

عزیزیم اودا یاندی،
من گلدیم، او دایاندی.
یار منه بیر اود ووردو،
من یاندیم، او دا یاندی.

چیسکین یاغیش یاغیردی،
منی بیر قؽز چاغیردی.
ممه‌سینه ال آتدیم،
«آنا» دئییب باغیردی.

داغ باشی آل بویاندی،
آل-الوان شال بویاندی.
جامالیندان نور یاغدی،
بۆتون ماحال بویاندی.

عاشیقم گۆله باخدی،
بۆلبوللر گۆله باخدی.
بیر گؤزل گۆلومسه‌دی،
آغزیندان گۆلاب آخدی.

گؤرونن ساوالاندی،
قؽزیلقوش اوو آلاندی.
دردین کیمی درد اولماز،
نه یامان ساغالاندی.

قاشلارین قیبلگاهدی،
قیبله دئسم گۆناهدی.
داغلارا دومان چؤکسه،
او دا من چکن آهدی.

ائل کؤچدو، داغ دولاندی،
داماغی چاغ دولاندی.
ال آتدیم شامامایا،
الیمه تاغ دولاندی.

آی دولاندی، ایل آشدی،
باغیم، باغچام گۆل آچدی.
یالواردیم دانیشمادی،
کۆسن کیمی، دیل آچدی.

عزیزیم دیلیماندی،
خوی، سالماس، دیلیماندی.
گؤزللیک بحثی دۆشدو،
سنی چوخ دیلیم آندی.

یار گلدی داغدان آشدی،
گؤردوم دیلیم دولاشدی.
گؤزون آهو گؤزودو،
بو قاش سنده نه قاشدی.

داغ باشیندا بوراندی،
بوران یاتیب، توراندی.
یار سینه‌سی منیمچون
هم داغدی، هم آراندی.

جئیرانیم داغدان آشدی،
گؤردوم، گؤزوم قاماشدی.
یارلا اۆز-اۆزه گلدیم،
بیردن دیلیم دولاشدی.

عاشیق بو گۆل بوتاندی،
گۆل دسته‌سین توتاندی.
آیلا گۆن بحثه گیردی،
جامالیندان اوتاندی.

میزار یۆزو قؽرمیزی،
یاندیریب یاخما بیزی.
آغ یۆزونو دیشله‌سم،
قان چؽخار قؽپقیرمیزی.