بایاتی

گل گئدک دولان باغی،
گۆللری سولان باغی.
پروانه‌دن اؤیرندیم
باشینا دولانماغی.

مهله‌میزین قوچاغی،
اولما یارین قاچاغی.
بیر سحر گل، بیر آخشام،
بیر ده گۆنورتا چاغی.

گؤز گؤردو اول ساداغی،
اول اوخو، اول ساداغی.
تنهایی دئر: یار جؤورین
چکرم اولسا داغی.

اززی‌یم بوساجاغی،
یاخشیدی بوسه چاغی.
ترلانین اویلاغیدی،
سونانین بوساجاغی.

الینده بو سداغی،
اووچونون بوسا داغی.
چؽخماز عاشیق کؤنلوندن
جانانین بوسه داغی.

الیمده سو سانجاغی،
سو تؤک یویوم سانجاغی.
ائله خوشوما گلیر
ایگیدین اوتانجاغی.

قورشانمیش گؤر سداغی،
اوو گئدر گؤرسه داغی.
جنّتی نئیلر عاشیق،
جامالین گؤرسه داغی.

قارشیمیزدا باغدادی،
پاشا گزر باغدادی.
گئتمز بۆلبول سریندن،
گۆل سئوداسی، باغ دادی.

من عاشیق بوسه داغی،
یاردان آل بوسه داغی.
بیر اوخ بسدیر عاشیقه،
بوشالتما بو سداغی.

بو دره بوز باغلادی،
دیبی یارپیز باغلادی.
گلین ووردو، اوخلادی،
یارامی قؽز باغلادی.

عاشیق، یاراماز آغی،
بایقو یاراما زاغی.
توت خؽنالی بارماقدان،
ائیله یارلا مازاغی.

بالاکن چار قالادی،
هر طرفی تالادی.
یارین آل یاناقلاری
ائله بیل بیر لالادی.

عاشیقم یاز فراقی،
اوخویان، یاز فراقی،
تاماشادی بۆلبولون
گۆل ایله یاز فراقی.

اووچو اووون قوولادی،
بره اۆسته اوولادی.
جئیران کؤنول وئرمزدی،
یقین اونو توولادی.

یار باغچادا آغلادی،
اۆرگیمی داغلادی.
آخیتدیغی گؤز یاشی
ال-قولومو باغلادی.

داغ دؤشو ماغارادی،
چالینان ناغارادی.
اؤزون آغ مایا دیلبر،
گؤزلرین نه قارادی؟

منیم یاریم مولّادی،
آتین گۆموش ناللادی.
الینده تر شاماما،
گاه وئری، گاه آلدادی.

آرخالیغین خارادی،
باغریم باشی یارادی.
ایذن وئر، من ده بیلیم،
یار، اویلاغین هارادی؟

عجب سبزه‌لی باغدی،
گئتسم، یولوم اوزاقدی.
من سندن آیریلمارام،
نه قدر جانیم ساغدی.

آشیق خالقا ناییبدی،
آچما، خالخدان آییبدی.
زنخدان قؽپقیرمیزی،
مگر خال قاناییبدی؟