بایاتی

عزیزیم له‌له منی،
سینه‌نه بله منی.
ممن نئشتره دؤنوب،
قورخورام دله منی.

گل گئییندیر، آل منی،
بیر یادینا سال منی.
باس باغرینا ساز کیمی،
حزین-حزین چال منی.

عزیزیم سسله منی،
گۆن گئدیر، سسله منی.
رحم ائیله من طیفیله،
سینه‌نده بسله منی.

یاخاندا بۆز علمه‌نی،
اۆستونه دۆز علمه‌نی.
وفالی یار یاد اولماز،
گؤرمه‌سه یۆز ایل منی.

داغلاردا سسله منی،
قوینوندا بسله منی.
نئجه کی من ایسترم،
ائله ده ایسته منی.

گؤزله بو ساردان منی،
آییرما یاردان منی.
زۆلفونو کمند ائیله،
قورتار بو داردان منی.

عاشیق، قارالار منی،
زۆلفون قارالار منی.
خیالیننان یاتمیشدیم،
باسدی قارالار منی.

عزیزیم اووچو منی،
داغلاردان قوو چیمه‌نی.
یا مه‌لرم، تاپارام،
یا وورار اووچو منی.

بوردا سار آلار منی،
زۆلفون قارالار منی.
سنسیز یاتاغا گیرسم،
یاتاق یارالار منی.

سو سنی، سودا سنی،
ساخلاسین خودا سنی.
بیر اؤپوب، بئش قوجایدیم،
شیرین یوخودا سنی.

یاد گلر آلار منی،
دۆزلره سالار منی.
گؤز اول شاهمار تئللره،
قورخورام چالار منی.

عزیزینم ها سنی،
حاق ساخلاسین ها سنی.
سنین کؤنلون نار ایستر،
منیم کؤنلوم ها سنی.

آتیبدی چوخلار منی،
بیرجه یار یوخلار منی.
آماندیر، ائله باخما،
کیرپی‌یین اوخلار منی.

گؤزوم، گؤز گؤره سنی،
کاباب، کؤز گؤره سنی.
ایستمم اؤز گؤزومنن،
آیری گؤز گؤره سنی.

قؽزیلگولم، در منی،
مخمر اۆسته سر منی.
مخمر اۆسته سرمه‌سن،
سینه‌ن اۆسته سر منی.

سئودیم ازلدن سنی،
حرفی غزلدن سنی.
یوخلادیم کمالینی،
قویدوم تئز الدن سنی.

عزیزیم نئیلر منی،
اۆزدو بو نئیلر منی.
گئدین یاردان سوروشون،
چاغیریب نئیلر منی؟

عزیزیم کۆله‌جه‌نی،
گئی، ساللان، کۆله‌جه‌نی.
من ده سنین یولوندا
دؤندردیم کۆله جانی.

قوربان گؤتور کس منی،
قناره‌دن آس منی.
آل کؤنلومو، ساز ائیله،
سینه‌ن اۆسته باس منی.

مجنون گزر لئیلینی،
بیلمز اونون فعلینی.
اوغلانین قایداسیدیر،
قؽزا سالار مئیلینی.