بایاتی

بو داغلار اینجیدندی،
دۆر، صدف، اینجیدندی.
کسرم من دیلیمی،
بیلسم یار اینجیدندی.

باغچامیزدا بار ایندی،
هر نه دئسن وار ایندی.
آچ یاخان دۆیمه‌سینی،
قوی گؤرونسون نار ایندی.

قؽزیل گۆل لپه‌لندی،
مئه ووردو لپه‌لندی.
یاریمنان خبر گلدی،
اۆرگیم لپه‌لندی.

گؤزلرین خومار ایندی،
یاش تؤکر یومار ایندی.
چک شالین سینه‌ن اۆسته،
گؤرن نار اومار ایندی.

آی دوغدو، قلبیلندی،
دوغدوقجا قلبیلندی.
نه‌یه دئسن آند ایچیم،
بو قلب او قلبیلندی.

آی گئدر، باتار ایندی،
نازلی یار یاتار ایندی.
لئیلی‌نین بازاریندا
مجنون جان ساتار ایندی.

یاریم گلیر، نه شندی؟
زۆلف اۆزونده هشمدی.
من زر بیلن صرّافام،
گؤزل سئچمک پئشمدی.

آرپا چایی دریندی،
سویون ایچدیم سریندی.
نه یاتیبسان دور، اوغلان،
کئچن بو نازپریندی.

الینده آلماز ایندی،
توتوبدو آلماز ایندی.
بیرجه جان، بیر ده بوسه،
وئررسم آلماز ایندی.

آی دوغدو، ایشیق وئردی،
یارا یاراشیق وئردی.
سینه‌ندن اولدوز دوغدو،
گؤزومه ایشیق وئردی.

بو باغ امیمگیلیندی،
گل ترینی سیل ایندی.
جفا چکدین، یار سئودین،
یارین قدرین بیل ایندی.

عاشیقین گلن دردی،
گۆل اکدیم، گلن دردی.
جانیمدان یئی ساخلارام
جاناندان گلن دردی.

سال گلدی، سونا میندی،
قوی گلسین سونام ایندی.
بیر دفعه اۆزون گۆلسه،
منیمچون سانی میندی.

چکدی ایللر بو دردی،
چکن بیلر بو دردی.
کؤنلومدن سیلسه آنجاق
یاریم سیلر بو دردی.

باکی‌نین یئلی اسدی،
اسیب صبریمی کسدی.
ساغ گؤزوم سنه قوربان،
سول گؤزوم منه بسدی.

آراخچی‌نین میل-میلی،
زر اۆسته‌دیر هر گۆلو.
بیزیم باغدا اوخوسون
سیزین باغین بۆلبولو.

آراز بورولدو گئتدی،
سویو دورولدو گئتدی.
من دئدیم یار اینجیدی،
دئمه یورولدو گئتدی.

آی دوغدو پرل-پرلی،
قاپی‌سی قوشا نرلی.
گیره‌یدیم یار قوینونا،
چؽخایدیم ترل-ترلی.

اود یاندی، اودو کئچدی،
قلیانین اودو کئچدی.
آچ گؤزون، غافیل اووچو،
مارالین اودو، کئچدی.

ککلیگین پرندیمی؟
تورونو هؤرندیمی؟
آت اۆربندی اۆزوندن،
گؤروم من گؤرندیمی؟