بایاتی

سویا گئدن ساری قؽز،
ساری کؤینک، ساری قؽز.
گؤزلری شاه آلماسی،
اؤزو دۆنیا مالی قؽز.

او شهلا گؤز، خومار گؤز،
یار اغیارا یومار گؤز.
بیر قلبیم وار وئریرم،
جانیمی دا اومار گؤز.

قاشلاری کامان، آی قؽز،
ایمه گل، آمان آی قؽز.
وعده وئریب گلمه‌سن،
اوللام بدگومان، آی قؽز!

من عاشیقم، یانا اۆز،
اؤردک گؤلده یانا اۆز.
نئجه‌سن بیر آه چکیم،
یاش تؤکوله، یانا اۆز!

اۆزونده خالین، آی قؽز،
خوشدو جامالین، آی قؽز.
اؤلدورور نازین منی،
ندی خیالین آی قؽز؟

یاشین گلسین یاشا دۆز،
سانجاغینی بوشا دۆز.
یاردان آیری دۆشه‌نین
آغلی گلمز باشا، دۆز.

من عاشیق یۆز یئردن اۆز،
سونالار، یۆز یئردن اۆز.
مۆژگان سایه‌سی دۆشموش،
داغیلمیش یۆز یئردن اۆز.

قارا کلیم خسته‌دی،
قویروغو گۆلدسته‌دی.
من بیر گلین سئومیشم،
یئتیشیب پئیوسته‌دی.

آشیق سؤزو دۆز دئدی،
گۆلو باغدان اۆز دئدی.
خالین یئری بوخاقدیر،
نیه سنده اۆز دئدی؟

داغلار باشی مئشه‌دی،
کؤنلوم سؽنیق شۆشه‌دی.
یارین یارا تؤحفه‌سی
بیر دسته بنؤوشه‌دی.

آشیق سؤزون نس دئدی،
گل دیلیمی کس دئدی.
من دئدیم بیر بوسه وئر،
او مندن جان ایسته‌دی.

گلن آشیق ولیدی،
الینده یار علیدی.
هر ظۆلمونه دؤزرم،
سؤودامین اوّلیدی.

کیلیم-گبه یۆکده‌دی،
گؤزلرین گدیکده‌دی.
دؤنوب گئری باخسانا،
سئودیگین یار دیکده‌دی.

بو باغلار مئیوه‌لیدی،
گؤزلرین عیشوه‌لیدی.
نه یاتمیسان، خومار گؤز،
قوینوندا یار علیدی.

آشیق سؤزون گیزله‌دی،
سؤزون دۆزون گیزله‌دی.
سن باخچایا چؽخاندا
لاله اۆزون گیزله‌دی.

دیلی نه مزه‌لیدی،
سئودامین ازلیدی.
من سئودیگیم بو گؤزل
ائللرین گؤزه‌لیدی.

آشیق رضا سنله‌دی،
حؤکم-ریزه سنله‌دی.
ساخلاسان قولون اوللام،
ساتسان، رضا سنله‌دی.

بو دره سکمه‌لیدی،
بوردا گۆل اکمه‌لیدی.
من یاریمی تانیرام،
دیزدک چکمه‌لیدی.

گؤزلرین مستدی، ندی؟
یولومو کسدی، ندی؟
یار منی اؤلدورمکده،
بیلمیرم قصدی ندی؟

گؤر عاشیق در دمیدی،
خسته‌نین در دمیدی.
طبیب، درمانین آپار،
یارامین در دمیدی.