بایاتی

سو گلر آخار، دویماز،
داغ داشی یاخار، دویماز.
گؤزلریم یار گؤزونه
اؤلونجه باخار، دویماز.

قاراباغدا باغ اولماز،
قارا سالخیم آغ اولماز.
یاد یئردن قؽز سئوه‌نین
اۆرگینده یاغ اولماز.

عزیزیم باخار، دویماز،
یاندیرار-یاخار دویماز.
باخدیقجا گؤزلریمدن
قانلی یاش آخار، دویماز.

بیر گۆل ایلن یاز اولماز،
یازین عؤمرو آز اولماز.
اؤلدوم نازین چکمکدن،
بئله ارکیناز اولماز.

اززی‌یم دردی قالماز،
باغریندا دردی قالماز.
یار یارا تئز یئتیشسه،
اۆرکده دردی قالماز.

داغ باشیندا ایز اولماز،
دره، تپه، دۆز اولماز.
یارین بویو گؤدکدی
گؤزل عیبسیز اولماز.

عزیزیم گئدر قالماز،
آخار سو گئدر، قالماز.
وفالی الین اۆزمز،
وفاسیز گئدر، قالماز.

اولدوز دؤنوب آی اولماز،
یاز گئتمه‌سه یای اولماز.
کؤنول سئون گؤزه‌له
گؤزللیکده تای اولماز.

داغ باشین دومان آلماز،
یار یاری درده سالماز.
یار منه بیر درد وئریب،
یۆز ایل کئچه ساغالماز.

بولود گلسه آی اولماز،
بیر گۆل ایلن یای اولماز.
تامام ائلده، ماحالدا
سئوگیلیمه تای اولماز.

ائله آغلاماق اولماز،
سینه داغلاماق اولماز.
عهده وفاسیز یارا
اۆرک باغلاماق اولماز.

عرب آتی زای اولماز،
کؤهلن آتا تای اولماز.
من کی سندن پای اومدوم،
بیر اؤپوشدن پای اولماز.

بو داغی آشماق اولماز،
نارینجی باشماق اولماز.
بیر قورو سؤزدن اؤترو
یارلا ساواشماق اولماز!

بو داغی ائنمک اولماز،
یاشیل گئیینمک اولماز.
هر یئته‌نین سؤزویله
ایلقاردان دؤنمک اولماز.

اوچان قوش لۆمک اولماز،
آجی سؤز یئمک اولماز.
بی‌وفا یار سؤزونو
هئچ یئرده دئمک اولماز.

درد الیندن جان دورماز،
یارام چوخدو، قان دورماز.
یار ائله یاندیردی کی،
اود دا بئله یاندیرماز.

دورنا تک سۆزمک اولماز،
بو درده دؤزمک اولماز.
بیر غمزه، بیر ناز اۆسته
یاردان ال اۆزمک اولماز.

داغ باشیندا قوش دورماز،
باهار گلسه قؽش دورماز.
جاوان اوغلان، جاوان قؽز،
یۆز آند ایچسه دینش دورماز.

باهاردا خزل اولماز،
یار یاردان بئزار اولماز.
سئوگی عیبسیز اولسا،
عیبسیز گؤزل اولماز.

گۆن دولانار آی باتماز،
یار دردی درده قاتماز.
گؤز گؤروب کؤنول سئون،
یاخین گلر، سؤز آتماز.