بایاتی

عزیزی‌یم ترتره،
بو یول گئدیر ترتره.
اۆز قویوم اۆزون اۆسته،
قوی قاریشسین تر تره.

خال وورموسان خال اوسته،
زۆلفو تؤکمه شال اۆسته.
سؤز دئدین، کؤنول آلدین،
شربت تؤکدون بال اۆسته.

چؽخارام اۆزوم اۆسته،
اوینارام دیزیم اۆسته.
سن منه قوناق گلسن،
ساخلارام گؤزوم اۆسته.

عزیزیم اویان گئجه،
شئه دۆشدو گئینگئجه.
جان جسدده تیتره‌یر
ال-اله دگن گئجه.

شئه دۆشور اۆزوم اۆسته،
نیمچه وئر، دۆزوم اۆسته.
یاری منه یئتیرین،
پئشکشی گؤزوم اۆسته.

یایلیغین میجه-میجه،
درده من دؤزوم نئجه؟
یئددی قوربان کسرم
سن بیزه گلن گئجه.

چن گئدیر چمن اۆسته،
دۆشور یاسمن اۆسته.
یار نه واخت بیزه گلسه،
یئری وار سینه‌م اۆسته.

عزیزیم تکجه-تکجه،
خاللارین تکجه-تکجه.
باش قویوم دیزین اۆسته،
دانیشاق تکجه-تکجه.

من عاشیق ایذین اۆسته،
ایز سالما ایذین اۆسته.
ایذین وئر بیرجه دفعه
باش قویوم دیزین اۆسته.

ترتردن گرک اینجه،
یول چکمیش گرگینجه.
درمانسیز درددن عاشیق،
گؤتورگیل گرگینجه.

آغاجدا اۆچدو پۆسته،
قؽزیل، گۆموشدو پۆسته.
یار دوداغین بۆزنده
یادیما دۆشدو پۆسته.

چاییر اینجه، سو اینجه،
سو سپرلر بیرینجه.
آدام اؤزوندن چؽخیر
سئودیگینی گؤرونجه.

ائولری ترتر اۆسته،
تن یورغان اؤرتر اۆسته.
یارین چوخاسی بیزده،
گؤرن نه اؤرتر اۆسته.

آراز قؽراغی مئشه،
گتیر دسمالین دؤشه.
آراسینا گۆل دۆزوم،
یانلارینا بنؤوشه.

اوغلان، اوتور داش اۆسته،
یومرو پاپاق باش اۆسته.
اوغلان دئیر: بیر اؤپوش،
قؽزلار دئیر: باش اۆسته.

داغ باشیندا وار آیاز،
اۆستون آلیب قار، آیاز.
دردیم آنام بیلمه‌سین،
نه یازیرسان یارا یاز.

اوتوروبسان داش اۆسته،
چال پاپاغین قاش اۆسته.
سن نه واخت گؤز ائیله‌دین،
من دئمه‌دیم: «باش اۆسته!»

باغچادان گۆلو اۆز یاز،
دردیمی ایپه دۆز یاز.
قلمه، دیله گلمز،
یارین تعریفین یۆز یاز.

ایل دولاندی گلدی یاز،
بۆلبول ساتدی گۆله ناز.
آغلیم باشیمدان آلدی
بوردان گئدن سرویناز.

داغ اۆسته بوغ آغ اولماز،
شوراندا دوز آغ اولماز.
یار یاردان آیری دۆشسه،
اۆرکدن اوزاق اولماز.