بایاتی

من عاشیقم در، دئ نه؟
گۆل بوداقدان در، دئ نه؟
آختاردیم بیر دردلی یار،
قاتدیم دردیم دردینه.

گؤزلریم آخدی سنه،
آخدیقجا باخدی سنه.
من سنی قیبله بیلدیم،
قؽلدیم بئش واختی سنه.

سایدیم اولدوز یۆز دنه،
بیر تسبئحدی، یۆز دنه.
او گۆنوندن قورخورام،
اینجی‌یه‌سن، اۆز دؤنه.

من عاشیق نئیلیم سنه،
قونوبدو مئیلیم سنه.
من دؤنسم، اۆزوم دؤنسون،
سن دؤنسن نئیلیم سنه؟

اززی‌یم منگه‌له‌نه،
زۆلفلری تن گلنه.
قوینوندا شکی ناری،
ساخلارسان من گلنه.

واردی بیر سؤزوم سنه،
دۆشوبدو گؤزوم سنه.
پولوم یوخ قوربان آلیم،
قوربانام اؤزوم سنه.

سو گلیر پر گلنه،
زۆلفون باس ترگه‌له‌نه.
اۆزون بیر آی پارچاسی،
گؤسترمه هر گلنه.

من عاشیقم جان سنه،
قالمیشام حئیران سنه.
یۆز قوربان دئین اولسا،
من اؤزوم قوربان سنه.

من عاشیق هر گلنه،
هر گئدیب، هر گلنه.
ممن جنّت مئیوه‌سی،
گؤسترمه هر گلنه.

من عاشیقم جان سنه،
قوربان سنه، جان سنه.
سن منی شیرین چاغیر،
منسه دئییم، جان سنه.

عزیزی‌یم جان سنه،
گل کسیم قوربان سنه.
نه سیرّیدی قالیبدی،
ائل-اوبا حئیران سنه؟

عزیزیم سینه، سینه،
میم یاز گۆل سینه‌سینه.
جالاسان بیترمی اولا،
سینه‌م دوست سینه‌سینه‌؟

یار گلدی یوخون سنه،
پای وئردی چوخون سنه.
سن یارا نئیله‌دین کی،
ووروبدو اوخون سنه؟

عزیزیم سینه-سینه،
صیّاد گز سینه-سینه!
مجنون کؤنلوم بند اولوب
لئیلی‌نین سینه‌سینه.

گلینه باخ، گلینه،
سارماشایدیم بئلینه.
او قؽزین اینجه بئلی
نه واخت دۆشر الیمه؟

داغلارین سینه‌سینه.
اوو قالخیر سینه‌سینه.
بوردا بیر صیّاد دوروب،
تور قورور سینه‌سینه.

الینه جان الینه،
تامبورون بئش تئلینه.
آچ قوللارین سارماشیم
نازیک، اینجه بئلینه.

عاشیق جانان سسینه،
جان وئر جانان سسینه.
ساللانیب جانان گئتدی،
دۆشدو جانان سسینه.

من عاشیق گؤزلرینه،
قوی باخیم گؤزلرینه.
جانیم جانینا قوربان،
گؤزلریم گؤزلرینه.

من عاشیق خان گؤزونه،
سو تک آخان گؤزونه.
نه سۆرمه‌دی چکیبسن
ائولر یؽخان گؤزونه.