بایاتی

عزیزی‌یم یاد اله،
وئرمه قوشوم یاد اله.
آت مۆژگانین سینه‌مه،
یا داغیدا، یا دله.

سو گلیر گیله-گیله،
بۆلبوللر گلیر دیله.
یاریمی باغدا گؤردوم،
باتیبدی قؽزیلگوله.

من عاشیق نارین اله،
نارین از، نارین اله.
باغی برک، باغچاسی برک،
هئچ وئرمز نارین اله.

آراز آخار لیل ایله،
سویو گلر گۆل ایله.
یار منی یولا سالدی
شیرین-شیرین دیل ایله.

داغ باشینا چن گله،
دومان گله، چن گله.
باغچامیزدان اۆز نارین،
اوینات سونرا چنگه‌له.

دریا دولو لیل ایله،
یاریم اوینار گۆل ایله.
هامی‌یا جان باغیشلار،
منی ساخلار دیل ایله.

عاشیق مینایه گله،
خالین مینایه گله.
کۆسموشم، باریشمارام،
گؤیدن مین آیه گله.

عزیزی‌یم باغ گۆله،
باغچا گۆله، باغ گۆله.
پروانه ده منیم تک
بند اولوب بیر آغ گۆله.

گئدیردیم یاراق ایله،
اوت بیچدیم اوراق ایله.
بیر ایلقارلی گؤزه‌لی
گزیرم سوراق ایله.

عزیزی‌یم گۆل گۆله،
بۆلبول گۆله، گۆل گۆله.
یار باشینا گۆل تاخدیم،
جالاق اولدو گۆل گۆله.

ککیله باخ، ککیله،
ککیل اۆزه تؤکوله.
قیامت او گۆن قوپار،
یار گؤزومدن چکیله.

سو گلیر لۆله-لۆله،
یار گلیر گۆله-گۆله.
الینده گۆللو دسمال،
قان-ترین سیله-سیله.

اۆزوم دردیم تنکله،
سویون ایچدیم سنکله.
یاری باغچادا گؤردوم،
الین سؽخدیم هنکله.

عزیزی‌یم نه دئمه،
نه دانیشما، نه دئمه،
قوی اؤپوم آل یاناقدان،
من ده چاتیم عهدیمه.

گئجه‌نی دان ائیله‌مه،
زۆلفونو یان ائیله‌مه.
باخیشینا من قوربان،
کؤنلومو قان ائیله‌مه.

یاریم یاد اولدو منه،
دۆشمن شاد اولدو منه.
اوبادا بیر قؽز سئودیم،
قورو آد اولدو منه.

عزیزیم کلمه-کلمه!
سؤزون دئ کلمه-کلمه.
اوتوراق خلوت ائوده،
دانیشاق کلمه-کلمه.

عزیزیم شیرین منه،
درماندی شیرین منه.
فرهادین شیری‌نیندن
شیرینسن، شیرین منه.

گؤیریب باغچا نانه،
باغ نانه، باغچا نانه.
اینتیظارلی گؤزلریم
دویونجا باخ جانانه‌!

سو گلیر، آخ دئسه‌نه،
شیمشه‌یه چاخ دئسه‌نه.
سن منیم شاهزادامسان،
قورموشام تاختی سنه.