بایاتی

او پالیدین تیرینه،
هئچ چاتمادیم سیرّینه.
قالانلا ایشیم یوخدور،
قوربان اولوم بیرینه.

یوخ عاشیق گۆل یۆزونه،
شئه دۆشموش گۆل یۆزونه.
پریم باغیندان گلیر،
سانجیبدی گۆل یۆزونه.

عزیزی‌یم باغ سینه،
صیّاد کئچه داغ سینه.
باخدیم، هوشوم آپاردی،
مرمر بوخاق، آغ سینه.

عزیزیم گۆل اۆزونه،
شئه دۆشوب گۆل اۆزونه.
اوتورایدیم دیز-دیزه،
باخایدیم گۆل اۆزونه.

عزیزیم بئله‌سینه،
دولان گل بئله‌سینه.
قوی دوروم قوربان اولوم،
گؤزلرین گیله‌سینه.

من عاشیقم اۆزونه،
حئیرانام قاش-گؤزونه.
سن مندن ال اۆزمزدین،
باخدین اؤزگه سؤزونه.

بو تپه، داشدی تپه،
سندن کیم آشدی، تپه؟
اووچویا خبر یئتیر،
مارالین قاچدی، تپه!

اووچو اووون دۆز گؤره،
دۆز دولانا، دۆز گؤره.
من یارا نئیله‌دیم کی،
آتدی منی گؤز گؤره.

گۆن گئتدی یاتان یئره،
آی گئتدی باتان یئره.
سینه‌می نیشان قویدوم
یار اوخون آتان یئره.

اودون گؤتور تندوره،
جانیم اودا تن دورا.
عاشیقه شان دئییلمی،
یاخشی ایله تن دورا؟

دومان آلدی داغ، دره،
داشا داغیلدی فره.
اووچو مارال آختاریر،
گؤسترمه یئرین، دره.

اۆزومو در سبته،
نه قورخو وار، نه خطه.
ائله یار سئومیشم کی،
سس سالیب مملکته.

بو دره درین دره،
سولاری سرین دره.
یاردان جاواب آلینجا
یالوارمیشام مین کره.

قؽزیلگول دسته-دسته،
بۆلبول قونار گۆل اۆسته.
بوردا بیر یار سئومیشم،
آلا گؤز، بویو بسته.

بو دره نارین دره،
تورپاغی نارین دره.
گؤزله‌ییرم یار گله،
قلبیمین نارین دره.

بولود گلیر داغ اۆسته،
شئه تؤکولور باغ اۆسته.
شامامانی گیزله‌مه،
قوی گؤرونسون تاغ اۆسته.

بو دره اوزون دره،
گئتدیکجه اوزون دره.
بوردا بیر باغ سالمیشام،
یار گله اۆزوم دره.

آی چؽخیبدی داغ اۆسده،
لکه‌سی وار آغ اۆسده.
زۆلفون بیر شاهمار ایلان،
قؽوریلیبدی تاغ اۆسده.

آی دوغوبدو بیزلره،
قولاق وئرین سؤزلره.
بو جانیم قوربان اولسون،
یالقیز یاتان قؽزلارا.

آراز اۆسته، بوز اۆسته،
کاباب یانار کؤز اۆسته.
قوی منی اؤلدورسونلر
بیر آلاگؤز قؽز اۆسته.