بایاتی

قدک آلدیم یاخالیق،
گلدی دۆشدو باهالیق.
جان اۆزوب یار سئومیشم،
سن کؤمک اول، یا خالیق.

عزیزیم مزه سیزده،
مئی سیزده، مزه سیزده.
من سنین سرخوشونام،
مئیسیز ده، مزه‌سیز ده.

زرخارادان آرخالیق،
اشرفیدن یاخالیق.
بیر بوسه وئر او خالدان،
دادینا چاتسین خالیق.

بوستان اکدیم تاغ اۆزده،
آیران آلتدا، یاغ اۆزده.
من سنه نه دئدیم کی،
تر گؤروندو آغ اۆزده؟

آغاج آغاجا یوووق،
چؽخدی آغاجا تویوق.
بیر الیم یار قوینوندا،
بیرین آپاردی سویوق.

بیر قؽز گؤردوم گؤیمده،
گؤیم بوینون اینده.
الین الیمه وئردی
شامامالار دگنده.

او تایدا دوران بنده،
بیر هئیوا گؤردوم سنده.
هئیوا کیمی سارالدیم،
هئچ اینصاف یوخموش سنده.

عاشیقم یارا منده،
سؽزیلدار یارا منده.
اؤلور اولسام دیریللم
لبیندن، یار، امنده.

سو گلدی دولدو بنده،
آخدی تؤکولدو کنده.
اۆرگیمه اود دۆشدو
یار بوینونو بۆکنده.

درد منده، گئجه منده،
درد آرتدی گئجه منده.
طیفلین تک آغلار عاشیق
لبیندن گئج امنده.

بیر قؽز گؤردوم بیچینده،
ساری سۆنبول ایچینده.
من یاریمی سئومیشم
اون بئش یاشین ایچینده.

گۆن منده، گئجه منده،
درد گلیب کئچه منده.
گؤزلریم یاش آخیدیر
لبیندن گئج امنده.

عاشیق، قانا دگنده،
غمزه‌ن قانا دگنده.
سونادا جانیم قالیر
ترلان قاناد اگنده.

دؤورانین گردی منده،
جان قوربان دردیمنده.
عشقه اۆرجاه اولانین
تاپیلار دردی منده.

دان یئری سؤکولنده،
زۆلف اۆزه تؤکولنده.
شئه دۆشموش گۆله بنزر
آغ اۆزدن اؤپولنده.

دسمالین آغدی منده،
گۆللودو، آغدی منده.
یار، سنین بیر «یوخ» سؤزون
دۆگوندو، داغدی منده.

دان یئری سؤکولنده،
یئره نور تؤکولنده.
قدّیم کامانا دؤنر
یار قدّی بۆکولنده.

باغچا منده، بار منده،
هئیوا منده، نار منده.
سینه‌م عطّار دۆکانی،
هر نه دئسن وار منده.

من عاشیق قالا منده،
بۆرج منده، قالا منده.
یاردان بیر بوسه آلدیم،
یادیگار قالا منده.

عزیزی‌یم سینه‌نده،
اووچو اووون سینه‌نده.
طیفیلم، آل قوینونا،
بسله منی سینه‌نده.