بایاتی

عاشیقم بیر دم آرا،
نئشتر وور بیر دامارا.
منی زۆلفون ووروبدو،
ووردورما بیر ده مارا.

من عاشیقم نارینجا،
گۆل اکدیم کنارینجا.
سونام ساللاندی گلدی،
بیر لاچین دا یانینجا.

کؤینگین گۆلو خارا،
گئیمیسن گۆلو خارا.
جفانی چکن بۆلبول،
وئررمی گۆلو خارا؟

دریانین کنارینجا،
چؽخ، ساللان کنارینجا.
سونامدی باغدان گلیر،
بیر ترلان کنارینجا.

عزیزیم گۆلو خارا،
یایلیغین گۆلو خارا.
بۆلبوله خبر گئتسین،
وئردیلر گۆلو خارا.

بو باغدا بار اولونجا،
هئیوالار نار اولونجا.
دیل آچار دلی کؤنلوم
سن منه یار اولونجا.

کؤینگیم بوتا-بوتا،
کیم یاپیشا، کیم توتا.
ایکیمیز بیردن اؤلک،
قویولاق بیر تابوتا.

داغ باشینی قار آلیب،
باغچالاری بار آلیب.
هر یئته‌نه جان وئرمم،
بیر جانیم وار یار آلیب.

آرخالیغین جۆت یاخا،
یاخانا یار گۆل تاخا.
باش قویوم دیزین اۆسته،
جان وئریم باخا-باخا.

چلتی‌یه باسما آیاق،
لکلری بیرگه سایاق.
بئله گیزلی سئوگی‌نین
آدینی بس نه قویاق؟

عزیزیم اویماق-اویماق،
ائولری اویماق-اویماق.
هر ندن دویماق اولسا،
چتیندی یاردان دویماق.

بوستان اکدیم تاغباتاغ،
اگدیم سؽندی شاخ بوداق.
بیر سن، بیر من اولایدیق،
بیر ده بیر خلوت اوتاق.

آی دوغدو بیرجه بارماق،
قلبیمه باتدی قارماق.
ائل یاتدی، اوبا یاتدی،
منه قالدی یالوارماق.

اووچو گزیر گیروه،
باغچا دولان، گیر ائوه.
یار یارین بد گۆنونده
باشین قویار گیرئوه.

عزیزیم سندن ایراق،
دۆشموشم سندن ایراق.
قوی دردین منه گلسین،
تک اولسون سندن ایراق.

نه داد واردی مزه‌ده،
قیسمت اولسون بیزه ده.
سنه ده قوربان اولوم،
سنه باخان گؤزه ده.

باشیندا ساری سانجاق،
آغ سانجاق، ساری سانجاق.
کامیم آلماق ایسترم،
من اوشاق، یار اوتانجاق.

عزیزیم کؤزدره ده،
پاریلدار گؤز دره‌ده.
قوربان اولوم سنه ده،
سنده‌کی گؤزدره ده.

باشیندا ساری سانجاق،
سانجاق اولوب اویونجاق.
منیم نه تاقسیریم وار،
سن ناشی، من اوتانجاق؟

ائله‌دیمی سینه‌ده،
اووچو دوروب سینه‌ده.
قوی سؽغینیم قوینونا،
درمانیم وار سینه‌ده.