بایاتی

گلین بولاق آلتینا،
سرین بولاق آلتینا.
سن آغاج اول، کؤلگه سال،
بیز ده دولاق آلتینا.

عزیزیم داغدا قارا،
گۆن دۆشوب داغدا قارا.
ایتیرمیسن لئیلینی،
مجنون اول، داغ-داغ آرا.

عزیزیم یار آرخینا،
سو گلیب یار آرخینا.
اینجه‌دی بارماقلارین،
قورخورام یارار خؽنا.

عزیزیم گۆنده دارا،
زۆلفونو گۆنده دارا.
سندن الیم اۆزمرم،
چکسه‌لر گۆنده دارا.

ائله‌می داغدا قارا،
زۆلفونو باغدا دارا.
وفالی یاردان اؤترو
رومو گز، باغداد آرا.

گلیبدی سۆنبول زارا،
درد الیندن گۆل زارا.
بۆلبول اوللام، قونارام،
یار گۆل اولسا، گۆلزارا.

عبدالله، آیاق آرا،
شمیسن آیا قارا.
گؤردو کؤرکلو جامالین،
دۆشوبدو آیا قارا.

آشیق سۆزگون، گؤز یارا،
غمدن اۆزگون گؤز، یارا.
یار ندی، دویماق ندی؟
باخسا یۆز گۆن گؤز یارا.

عزیزیم اۆزو قارا،
قارانین اۆزو قارا.
گئدیرم یار یانینا،
علی بوش، اۆزو قارا.

عزیزیم دگدی یارا،
سو گلدی دگدی یارا.
لال اولسون منیم دیلیم،
نه دئدیم دگدی یارا.؟

یار گلدی بو دیارا،
کؤنلومه ائتدی چارا،
گؤزل بیر قؽز سئومیشم،
آی جاماللی، گؤز قارا.

عزیزی‌یم دیل یارا،
دوداق یارا، دیل یارا.
اوتورایدیم گؤز-گؤزه،
یئتیره‌یدیم دیل یارا.

داغلارین باشی قارا،
دیبی گؤی، باشی قارا.
بیر قؽز مانا اوخ ووردو،
گؤز آلا، قاشی قارا.

عزیزی‌یم یار یارا،
قارا باغریم یار یارا.
اۆرک تیترر، قان قاچار،
ناز ائیله‌سه یار یارا.

عزیزیم جانی یارا،
قلبی یان جانی یارا.
توتوم، قویوم قفه‌سه،
گؤندریم جانی یارا.

عزیزیم بو صاباحا،
سؤز وئردی بو صاباحا.
یار یاردان نئجه دویسون،
جان اوجوز، بوسه باها.

من عاشیق بو چاغلارا،
بۆلبول قونوب باغلارا.
قاییتماسان بره‌یه،
اووچو ساللام داغلارا.

یۆک اۆسته ساری خالچا،
کیم قالدیرا، کیم آچا.
او یارا قوربان اولوم،
دیندیره، کؤنلوم آچا.

عزیزی‌یم شؽخلارا،
زۆلفو دولاشیقلارا.
الیمه بیر ساز آللام،
قوشوللام آشیقلارا.

خال گؤرمه‌دیم خالینجا،
خالیندان کام آلینجا.
بیلسه‌یدیم بی‌وفاسان،
گؤز قویمازدیم دالینجا.