بایاتی

عزیزیم ممقانا،
یول گئدیر ممقانا.
کس باشیم سینه‌ن اۆسته،
قوی باتسین ممه قانا.

آی قؽز آدین مستانا،
گیرمه بیزیم بوستانا.
قورخورام یاغیش یاغا،
تر شاماما ایستانا.

ائله‌می گۆل ایستانا،
شئه دۆشه، گۆل ایستانا.
آییق اول، شئیدا بۆلبول،
خار قونار گۆلوستانا.

باخدیم هیجران آیینا،
آی ایسته‌دی یایینا.
جانیمی قوربان وئردیم،
یارین حاق-سایینا.

عزیزیم گۆلوستانا،
شئه دۆشدو گۆلوستانا.
قورخورام گؤز یاشیمدان،
قوینوندا گۆل ایستانا.

الینده یار یایینا،
قوربانام یار یایینا.
محشریدی عاشیقین،
گؤزوندن یار یایینا.

عزیزیم خانا-خانا،
ائولری خانا-خانا.
الیم بندیوان اولوب
زر بافتالی یاخانا.

من عاشیقم حالینا،
یارین خوش احوالینا.
گؤزلریم بندوواندی
آغ اۆزونده خالینا.

تنهایی، اؤزگه شانا،
زۆلف اۆزدو اؤزگه شانا.
لبلرین زنبوری‌یم،
گئتمزم اؤزگه شانا.

عزیزی‌یم سانینا،
دورنا باخماز سانینا.
سنه بیر یول باخانین،
اود سالیرسان جانینیا.

من حسرتی، او شانا،
زنبورودو او شانا.
عقلیم پریشان اولدو،
زۆلفو تؤکدو او شانا.

یار دئمز سؤز یارینا،
دگمه‌سین گؤز یارینا.
ساغالار خسته کؤنول
یئتنده اؤز یارینا.

چؽخدیم کپز داغینا،
باخدیم گننت باغینا.
قؽزیلگول جالاق اولوب
بنؤوشه یارپاغینا.

داغلارین لالاسینا،
گؤزلرین آلاسینا.
یارا کؤنلومو وئررم،
قورخورام آلا سؽنا.

چؤللرین بولاغینا،
کؤینگین زولاغینا.
دور گئدک، عزیز دوستوم،
سئوگیلی اویلاغینا.

گؤزلرین قاراسینا،
خال دۆشوب آراسینا.
یار گۆلوشو ملهمدی
اۆرگیم یاراسینا.

من عاشیقم آیینا،
بندم قاشین یایینا.
قورخورام مۆژکان چالام،
اۆزوندن گؤز یایینا.

قاشلارین قاراسینا،
دردیمین چاراسینا.
منی قؤنچه گۆل ائیله،
قوی سینه‌ن آراسینا.

قاشلارین قاراسینا،
خال دۆشوب آراسینا.
منیم بیر جۆت ناریمی
قوی سینه‌ن آراسینا.

داغلارین باشی قارا،
دیبی‌نین داشی قارا.
بو گۆن من بیر قؽز گؤردوم،
گؤزو شوخ، قاشی قارا.