بایاتی

داغدان ائندیم پیادا،
دردیم واردی ضیادا.
بیز خلوتده گؤروشدوک،
عالمه دۆشدو صدا.

آغدامین یوللاریندا،
بند اولدوم کوللاریندا.
بیر بازوبند اولایدیم
یاریمین قوللاریندا.

من عاشیق دوران آدا،
آخان سو، دوران آدا.
سنه قوربان، آی ننه،
یانیندا دورانا دا.

عاشیق داغ آراسیندا،
دومان داغ آراسیندا.
شام کیمی شؤعله چکدیم،
یاندیم یاغ آراسیندا.

عزیزی‌یم گۆل باغدا،
بۆلبول باغدا، گۆل باغدا.
سنسیز باغا گیرمرم،
خزل اولا گۆل باغدا.

عزیزیم اۆزو مایا.
قاش قارا، اۆزو مایا.
داغیلسین بولود زۆلفون،
ساتاشسین گؤزوم آیا.

من عاشیقم یاز باغدا،
بۆلبول اؤتر یاز باغدا.
یارا قوناق اولایدیم
قؽش اوتاقدا، یاز باغدا.

ائله‌دیمی او تایا،
بو خؽرماندی، او تایا.
زۆلفونو کمند ائیله،
منی ده چک او تایا.

عزیزیم گۆل آلاندا،
گۆل بیتمیش گۆلالاندا.
یاریم یادیما دۆشر
الیمه گۆل آلاندا.

گمین چؽخدی دریایا،
زۆلفون اۆزه تر یایا.
قلم قاشین گؤرموشم،
بنزتمرم هر آیا.

چؽخدیم بالاخانی‌یا،
باخدیم خلوتخانی‌یا.
یئل ووردو، تئل آیریلدی،
قورخدوم یاریم تانی‌یا.

مارالا باخ، مارالا،
وور، اوخ ایلن یارالا!
درد وئرن یار یئتیشسین،
دردیم دۆشسون قارالا.

گؤز دۆشدو یا دولمویا،
رقیبلر یاد اولمویا.
بیر اۆز گؤستر عاشیقه،
قاپیدا یاد اولمویا.

دولان گل سن بو داغلا،
یولو کس تن بو داغلا.
سنه یاخشی دئمزلر،
من اؤلرسم بو داغلا.

عزیزیم قالماقالا،
دینج باشین سالما قالا.
بیز گیزلین سئویشمیشیک،
کیم سالدی قالماقالا؟

خانچالی ایشله یوللا،
اۆستون گۆموشله یوللا.
یانینا بئش آلما قوی،
بیرینی دیشله یوللا.

من عاشیقم بوز قالا،
کؤسؤیلری دۆز قالا!
شؤوقون یۆزومه دۆشدو،
یؽخیلمیشدیم آز قالا.

داغین باشیندا قالا،
حئیرانام اۆزده خالا.
قاش-گؤز ایلن دانیشما،
اؤلدوم، آ جئیران بالا.

اوجاغا اودون قالا،
اود گتی، اودون قالا.
قورخورام دۆشم اؤله‌م،
جانیمدا اودون قالا.

بوخاری‌یا آز قالا،
اودون گتیر، آز قالا.
بیر اوخ آتدین عاشیقه،
اؤلدورموشدون آز قالا.