بایاتی

دۆشمنی یاریماسین،
یاریسا، قاریماسین.
تورپاغیما گؤز دیکسه،
هئچ ایشی ساریماسین.

آی دوغار، بدرین بیلر،
یار یارین قدرین بیلر.
زحمتله خوش گۆن گؤرن
امیین قدرین بیلر.

گۆلو دردیم تاباغا،
قویدوم قالدی صاباحا.
یارا مئهمان گئدنده
دورار چؽخار قاباغا.

بو یارا کیم صاداقا؟
کیم قوربان کیم صاداقا؟
من مجنون واریثی‌یم،
قویمارام کیمسه داغا.

ترلان گلیب بو باغا،
قونور بوداق-بوداغا.
اؤلو اولسام دیریللم،
دگسه دوداق-دوداغا.

سۆرونو سۆرون داغا،
دومان، گل بۆرون داغا.
لئیلی‌سی ایتمیش مجنون،
سالیبدی بیر اۆن داغا.

عزیزی‌یم بو باغا،
بو باغچایا، بو باغا.
بیر دفعه اۆزون گؤرسم،
جانیم وئررم صاداقا.

تبریز اۆستو ماراغا،
زۆلفون گلمز داراغا.
آختاریرام یاریمی،
دۆشوب سوراق-سوراغا.

بۆلبوللر اوچدو باغا،
قوندو بوداق-بوداغا.
دۆنیادا بیر جانیم وار،
اولسون یارا صاداقا.

یار گلیبدی یاتماغا،
گۆنده بیر بوی آتماغا.
صاباح یوخوسو شیرین،
قؽیمیرام اویاتماغا.

بۆلبوللر اوچدو باغا،
قوندو بوداق-بوداغا.
سینه‌ن بیر داغ آیریجی،
کؤلگه سالیب بوخاغا.

آی دولانیر باتماغا،
یوخوم گلمیر یاتماغا.
اللریم اؤیرنیبدی،
شوخ ممه اویناتماغا.

گل گئدک بیزیم باغا،
جانیم سنه صاداقا.
بۆلبول اولاق، اوخویاق،
قویاق دوداق-دوداغا.

عاشیقم یاراجیغا،
سونالار یارا جؽغا.
جان وئررم، بوسه وئرمز،
دۆشوبدو یار آجیغا.

ال وورارام قاشیغا،
سؤز دئیرم آشیغا.
من سنی آلاجاغام،
مهله‌مه یاراشیغا.

قؽزیلگول آچیلاندا،
آچیلیب ساچیلاندا.
یاریمدان آیریلایدیم
هر صاباح آچیلاندا.

من عاشیق کیم سعیادا،
تور قوروب کیم سعیادا.
گؤزده کؤنولده سنسن،
دۆشرمی کیمسه یادا؟

عزیزی‌یم بو جاندا،
گؤزل اولماز بو جاندا.
عشقین منی یاندیردی،
آلوولاندی بو جان دا.

من عاشیق کیم سعیادا،
تور قوروب کیم سعیادا؟
نه کیمیم کیمسنم وار،
نه سالماز کیمسه یادا.

آری بال سالی شاندا،
بالدان کام آلی شاندا.
چتین اولور آیریلیق،
گؤز گؤزه آلیشاندا.