بایاتی

کۆر قؽراغی توخماجا،
یئل وورا بورجون آچا.
یاریم بوخویلو گئتدی،
نولا بیر کیمسه آچا!

نه مدد وار، نه کرم،
نه آبیرسیز نؤکرم.
خان یانیندان گلیرم،
دینمه، دیشین تؤکرم.

اولدوزلار سۆرو کیمی،
آیین کسیری کیمی.
آپاردیلار بالامی،
فیرنگ اسیری کیمی.

خان یانیندا نؤکرم،
ایشیم یوخدور، بئکارام،
تؤوجونو گتیرمه‌سن،
باشیندا تورپ اکرم.

داغلارین داغی منی،
باغچاسی، باغی منی.
من سندن آیریلمازدیم،
آییردی یاغی منی.

اوخ دگدی یارالاندیم،
اۆرکدن پارالاندیم.
وطندن آیریلمازدیم،
زور ایلن آرالاندیم.

عزیزیم یار الیندن،
بۆلبول تک خار الیندن.
وفالی یاردان قاچدیم،
من بیر اغیار الیندن.

ائله‌دیمی، جیلوولار،
الیم کسدی جیلوولار.
یار توی گۆنو سۆرولدو،
دمده قالدی چیلوولار.

هارای ساغیر الیندن،
توتمور فاغیر الیندن.
یاری یاردان ائدنین
ظۆلوم یاغیر الیندن.

حالیما داغلار آغلار،
بو ماتم سینه داغلار.
قویما اوغول، آماندیر،
ظالیملار قولوم باغلار.

گئدیرم بو داغ ایلن،
الیمده چؽراق ایلن.
یاری ائلدن سۆردولر
اللرده یاراق ایلن.

آرازی آییردیلار،
قومونان دویوردولار.
من سننن آیریلمازدیم،
زور ایلن آییردیلار.

ترخون اکدیم بئل ایلن،
سوواردیم من سئل ایلن.
یاریمدان آیریلمازدیم،
آییردیلار فعل ایلن.

یار گلر، یاشا دولار،
یا آغلار، یا شاد اولار.
هیجران سؤزون ائشیتجک
گؤزلری یاشا دولار.

عزیزیم یازیغام من،
ال وورما، یازیغام من.
من اؤلسم سنه قوربان،
سن اؤلمه، یازیغام من.

سؤز کج گلسه، قان اولار،
اۆرکده شان-شان اولار.
ظۆلم ائلیین، قان تؤکن،
یا خان، یا سولطان اولار.

داغ باشیندا قالان وار،
یاری درده سالان وار.
ائله بیر های دۆشوبدور،
قول یؽغیرلار، تالان وار.

داغین دؤشو دۆز، هامار،
نه باغچا وار، نه ده بار.
اؤلکه‌یه بیر شاه گلیب،
قؽلینجیندان قان دامار.

قالالار، ها قالالار،
قالادان یول سالالار.
آنالار بالا وئرمز،
بلکه گۆجله آلالار.

قاتئق قؽراغ توخماچار،
یئل اسیب، بۆرجون آچار.
دوست بوخویلو قالیبدیر،
گتیر اونا بیر آچار.