بایاتی

ائله باخما، بئله باخ،
داغدان گلن یئله باخ.
تر تؤکدوک، اوبا سالدیق،
ائولر یؽخان سئله باخ.

ائله‌می نالام قارداش،
فریادیم-نالام قارداش،
توپ آتیلدی، بۆرج سؽندی،
آلیندی قالام، قارداش.

عاشیقم اشینه باخ،
داغلارین قاشینا باخ.
گئج سئودیم، تئز آیریلدیم،
فلکین ایشینه باخ.

یول اۆسته بولار ایمیش،
نه سرین سولار ایمیش.
عزرائیل، آدین بدنام،
جان آلان بولار ایمیش.

داغلار باشی قار ایمیش،
قاردان بیر آنبار ایمیش.
سؤزده شیرین دۆنیانین
اصلی زهیرمار ایمیش.

شاماخی بیر بازارمیش،
ائل بازاردا آزارمیش.
بۆلبولدن گۆل ایسته‌دیم،
او دا گۆلدن بئزارمیش.

من عاشیق اودا یانمیش،
اود دۆشموش، او دا یانمیش.
الیم دوست اتگیندن
اۆزدو بیر اودا یانمیش.

لنکران بیر بازارمیش،
دردیم غمیم هازارمیش.
بو گئدیشله، سن دئمه،
یار یاریندان بئزارمیش.

باشین ندن آغارمیش؟
او گۆل بدن آغارمیش.
سنه گۆوندیگیم داغ،
سنه ده قار یاغارمیش.

اۆزولموشم، اۆزولموش،
خومار گؤزلر سۆزولموش.
وارمی بیر منیم کیمی
علی یاردان اۆزولموش.

آراشقی‌نین ساللاما،
یودون، یئره توللاما.
چوخ دا گؤزل دئییلسن،
آغیز-بورون ساللاما.

عزیزی‌یم تندیره،
اودون قالا تندیره.
دده‌سیزین نه حدی،
دده‌لی‌یه تن دورا.

آشی سۆز قوی، قاینانا!
اودون دۆز قوی، قاینانا!
اوغلون آلدیم الیندن،
باشینا بوز قوی، قاینانا!

قاش قارا، گؤزلر آلماز،
یار یاری درده سالماز.
آخیر کی بو گؤزللیک
گئدر، سنه ده قالماز.

دامدا دیرک قاینانا!
شانا، کۆرک قاینانا!
اوغلو ائوه گلنده
هامیدان زیرک قاینانا!

بو گلن اؤزون بیلمز،
دانیشار، سؤزون بیلمز.
سویا تک گلن گؤزل
چئشمه‌نین گؤزون بیلمز.

بیر سس دۆشوب شونقارا،
شیکار گرک شونقارا.
جیک-جیک دئین سرچه‌لر
نئیلر شاهین-شونقارا.

رقیبدن کام آل ایندی،
دردین یادا سال ایندی.
کۆسدوروبسن یارینی،
ائوده یالقیز قال ایندی.

آی دوغدو باتان یئرده،
جان-جانا قاتان یئرده.
دوستا یادیگار وئردیم
یاخیندان اؤتن یئرده.

اوخلادی پر سینه‌می،
قان آلدی سر سینه‌می.
آچیق دانیش، آچیق دین،
یاندیرما تر سینه‌می.